Қозоғистон таълим вазири Ғани Бейсембаев мамлакатда 2023 йилда коррупционерлар пулига 70 та мактаб қурилишини маълум қилди. Бу ҳақда Tengrinews хабар берди.
![](/static/2023/zulfiya/photo_2022-05-19_15-59-22.jpg)
“2023 йил 70 дан ортиқ мактаб коррупционерлар пулига қурилади. Бунинг учун ҳужжатларимиз бор, рўйхат ҳам тузилган. Яқин кунларда бу рўйхат қўллаб-қувватланади ва мактаб қурилиши учун маблағ ажратилади. Мактаб қурилишида деярли 20 та вилоят қамраб олинади”, — деди вазир.
У лойиҳада янги мактаблар қуришдан ташқари, мавжудларини таъмирлаш ҳам кўзда тутилганини айтди. Қозоғостон Молия вазирлигининг махсус ҳисобида порахўр амалдорлардан мусодара қилинган 120 миллиард тенге (278 млн доллар) тўпланган.
Аввалроқ Қосим-Жўмарт Тўқаев халққа мурожаатида коррупционерлардан олинган пуллар мактаблар қуришга сарфланишини айтганди. “Умуман олганда, мактаблар қуриш ҳукумат ва ҳокимликларнинг асосий вазифаларидан бири бўлиши керак”, — деган у.