Чехияда Рамзан Қодировнинг оти ўғирлаб кетилди

Чехиянинг Литомерица шаҳридаги отхонадан қиймати қарийб 400 минг крон (18 минг доллар) бўлган от ўғирлаб кетилди. Бу ҳақда Cеskе noviny хабар берди.

Чехия Молия вазирлиги матбуот котиби Микаела Лагронова от Чеченистон раҳбари Рамзан Қодировга тегишли эканини тасдиқлади.

“Номаълум жиноятчи Литомерица яқинидаги отхонадан қиймати қарийб 400 минг крон бўлган зотдор инглиз отини ўғирлаб кетган. Полиция матбуот котиби Павла Кофрова от ўғирлангунга қадар Крабчицидаги отхонада бўлганини айтди”, — дейилади хабарда.

Отнинг исми Зазоу бўлиб, 16 ёшда бўлган. Maxсус белгилар орасида полиция унинг пешонасида оқ қашқа борлигини ва орқа ўнг оёғининг бир қисми ҳам оқ бўлганини айтди. Ўғирланган от 2012 йилда Германиянинг WH Sport International отхонасидан сотиб олинган. Айғир 36 та пойгада қатнашиб, шулардан тўққизтасида ғалаба қозонган ва 1,2 миллион евродан ортиқ даромад келтирган.

Idnes нашрининг хабар беришича, мазкур айғир бошқа бир қанча отлар қатори Қодировга қарши халқаро санкциялар асосида Чехия томонидан музлатилган мулкнинг бир қисмидир. Чеченистон раҳбари узоқ вақтдан бери отларни яхши кўриши билан танилган. Қодиров отлари турли нуфузли жаҳон пойгаларида қатнашиб, совринли ўринларни қўлга киритмоқда. Ёзда Маркус номли германиялик эркак Чеченистон раҳбарига от совға қилган. Қодиров мухлисга “ажойиб совға” учун миннатдорлик билдирган ва бундай имо-ишорадан ҳайратда қолганини ва қувонганини айтган.