Буюк Британия Мудофаа вазирлиги разведка маълумотларига таяниб, дам олиш кунларида Украина кучлари Донецк вилоятининг Бахмут ҳудудида мудофаа периметрини кучайтирганини маълум қилди. Тегишли баёнот вазирликнинг Twitter саҳифасида эълон қилинди.
“Украинанинг Бахмут мудофааси ҳар икки томондан Россия кучларини сиқиб чиқаришда давом этмоқда. Дам олиш кунларида Украина кучлари Россиянинг олдинги силжишидан кейин мудофаа периметрини барқарорлаштирган бўлиши мумкин”, дейилади баёнотда.
Британия разведкачилари 2 март куни Бахмутдаги кўприк портлатилганини эслатиб ўтди ва бу қайта таъминот ҳаракатларини мураккаблаштиришини маълум қилди. Бундан ташқари, разведка “Вагнер” ва Россия Мудофаа вазирлиги ўртасида ўқ-дориларни тақсимлаш бўйича оммавий келишмовчилик олдинга силжиш учун зарур бўлган шахсий таркибни ва ўқ-дориларни ушлаб туришда қийинчиликка сабаб бўлишини билдирди.
АҚШнинг урушни ўрганиш институти янги ҳисоботида Бахмут учун жанг “Вагнер” қўшинларини йўқ қилиши ва Россияни маҳоратли зарба қўшинларидан маҳрум қилиши мумкинлигини таъкидлади.
5 март куни Украина Шарқий кучлар гуруҳи спикери Сергей Череватий “Бахмут жанговар ҳаракатлар маркази бўлиб қолаётганини” ва “Украина Қуролли кучлари аҳоли пунктини ушлаб туришини” айтди.
“Бизда ўқ-дорилар, озиқ-овқат ва керакли жиҳозлар билан таъминлаш учун барча нарса етарли, ярадорларни у ердан олиб чиқиш имкони ҳам бор”, — деган у.
6 март куни Украина қуруқликдаги қўшинлар қўмондони генерал-полковник Александр Сирский Бахмут учун жанглар юқори шиддатлилик даражасига етганини қайд этди.
Изоҳ (0)