БМТ бош котиби Антонуи Гутерриш дунёда гендер тенглигига эришиш учун яна 300 йил керак бўлишини айтди. Бу ҳақда The Guardian хабар берди.
Гутерриш БМТ Бош ассамблеясидаги нутқи давомида бутун дунёда аёллар ҳуқуқлари поймол қилинишда давом этаётганини айтди. У хотин-қизлар ҳуқуқлари бузилишида оналар ўлими, қизларнинг мактабга бора олмаслиги, ҳамшираларнинг иш билан таъминланмагани, қизларнинг эрта турмушга чиқишига босим ўтказилаётганини мисол қилиб кўрсатди.
“Ўнлаб йиллар давомида эришилган ютуқлар кўз ўнгимизда йўқолиб бормоқда”, — деди Гутерриш.
У “Толибон” Афғонистон ҳокимияти тепасига келгач “аёллар ва қизлар жамоат ҳаётидан четда қолиб кетган”ини ҳақида эслатди. Шунингдек, Гутерриш кўп жойларда аёлларнинг жинсий ва репродуктив ҳуқуқлари поймол этилишини, баъзи мамлакатларда мактабга борган қизларни ўғирлаб кетиш хавфи борлигини тушунтирди.
"Гендер тенглиги истиқболи тобора узоқлашиб бормоқда. Ҳозирги ривожланиш суръати билан у 300 йилга орқага сурилмоқда”, — деди Гутерриш.
БМТ бош котиби гендер тенглигига эришиш учун ривожланаётган мамлакатларда аёллар ва қизларнинг таълим, даромад ва бандлик даражасини ошириш, уларнинг фан ва технология ривожланишидаги иштирокини рағбатлантиришни айтди.
“Патриархат, дискриминация ва зарарли стереотиплар даври илм-фан ҳамда технологияда катта гендер бўшлиқни яратди. Глобал тизим бутун дунё бўйлаб аёллар ва қизлар учун ишламайди. Улар ўзгариши керак”, — дея қўшимча қилди у.
Изоҳ (0)