АҚШ Мудофаа вазирлиги мингдан ортиқ америкалик амалдорларда аниқланган “Гавана синдроми”ни текшириш ва касалликдан ҳимоя воситаларини ишлаб чиқишда давом этмоқда. Бу ҳақда Politico хабар берди.
Пентагон касалликнинг сабабларини аниқлаш ва АҚШ фуқароларини ундан ҳимоя қилишга қандай ҳаракат қилаётгани ҳақида маълумот берилди. Мудофаа вазирлиги Марказий разведка бошқармаси томонидан эълон қилинган текширув натижаларига қарамай, “Гавана синдроми” бўйича ўз текширувини ўтказишга қарор қилган. Пентагон сирли касаллик душман томонидан қўлланган энергия қуроли сабабли келиб чиққани борасида ҳеч қандай далилга эга эмас.
Пентагоннинг тадқиқот бўлими, жумладан, армия ва ҳарбий ҳаво кучлари лабораториялари касаллик симптомларига нима сабаб бўлишини аниқлаш учун қурол тизимларини синовдан ўтказмоқда.
“Конгресс томонидан ваколат берилган Пентагондаги гуруҳ касаллик ҳолатларини бартараф этишга эътибор қаратмоқда. Бунга хасталик сабабларини аниқлаш, даволаш ва оқибатларини юмшатиш киради”, — деди Мудофаа вазирлиги расмийси, подполковник Девин Робинсон.
У Пентагон қурол яратишга эмас, балки жабрланганларга ёрдам беришга ҳаракат қилишини айтди ва “Гавана синдроми”га чалинганлар Мериленд штатидаги Уолтер Рид тиббиёт марказида даволанаётганини маълум қилди.
Пентагон узоқ вақт давомида лазер ва юқори қувватли микротўлқинларни ўз ичига олган йўналтирилган энергиянинг ҳарбий қўлланишини ўрганиб чиқмоқда ва бугунги кунда ушбу технологияни ўрганиш учун йилига тахминан 1,5 млрд доллар сарфлайди.
“Гавана синдроми” ҳақида қисқача маълумот
Касаллик биринчи марта 2016 йилда, Куба пойтахтидаги АҚШ элчихонасида ишлаган бир гуруҳ америкалик дипломатларда бош айланиши, кучли бош оғриғи ва вақтинча эшитиш қобилиятини йўқотиш кузатилганида маълум бўлган. Ўшандан бери АҚШ расмийлари шунга ўхшаш ҳолатлар ҳақида бир неча бор хабар берган. Аввалига оммавий ахборот воситаларида касалликка номаълум қурол сабаб бўлгани ҳақида миш-мишлар тарқалган, аммо бу версиянинг далиллари топилмаган.
Изоҳ (0)