Буюк Британиянинг собиқ бош вазири Борис Жонсон отаси Стенли Жонсонни рицарликка номзод қилиб кўрсатди. Бу ҳақда манбаларга таяниб, The Times хабар бермоқда.
Жонсон собиқ бош вазир сифатида, ўзи рицар бўлишга лойиқ деб ҳисоблаган шахсларни номзод қилиб кўрсатиши мумкин. Газетанинг ёзишича, сиёсатчи 100 га яқин исмлар рўйхатини тузган бўлиб, улар орасида 82 ёшли отаси ҳам бор. 2016—2019 йилларда бош вазир бўлиб ишлаган Тереза Мей ўз рўйхатига бор-йўғи 60 нафар, ҳукуматнинг яна бир собиқ раҳбари Девид Кемерон эса 62 нафар одамни киритган, деб ёзади газета.
Бу унвон Жонсоннинг отасига берилса, сиёсатчига қарши янги даъволар бошланиши мумкин, деб ёзади газета. Аввал, 2020 йилда Жонсоннинг акаси Жозеф билан ҳам шундай бўлган, у собиқ бош вазирнинг таклифига биноан Лордлар палатасидан ўрин олганди, деб ёзади газета. Жозеф Жонсон Мерилбон барони унвонига эга.
Собиқ бош вазирлар томонидан илгари сурилган номзодлар Британия Вазирлар Маҳкамаси котибиятининг тақдирлаш комиссияси тасдиғидан ўтади, кейин рўйхат амалдаги бош вазир томонидан тасдиқланади. Шундан сўнг, рўйхат имзолаш учун қиролга юборилади.
Жонсон 2019 йилнинг ёзида Британия бош вазири лавозимида иш бошлаган ва 2022 йил июлида истеъфога чиқишини эълон қилганди. Бу ҳукмрон Консерватив партиянинг Жамоатлар палатасида собиқ бош ташкилотчи ўринбосари Крис Пинчер билан боғлиқ жанжал фонида Британия ҳукуматининг ўнлаб амалдорлари ишдан бўшатилиши ортидан содир бўлди. Пинчер Лондоннинг элита консерватив клуби “Карлтон”да маст ҳолда муштлашган ва икки эркакни ҳақорат қилган. Бу ҳақда оммага маълум бўлгач, Пинчер узр сўради ва истеъфога чиқди.
Кейинчалик маълум бўлишича, Жонсон Пинчерни юқори лавозимга тайинлаш чоғида у парламент текшируви остида эканини билган. Жонсон Sky News телеканалига берган интервьюсида сайловчилардан узр сўради ва Пинчерни тайинлаш бўйича қарорларидан афсусда эканини айтди.
Изоҳ (0)