Буюк Британия собиқ бош вазири Борис Жонсон парламентга навбатдаги сайловларда Аксбридж ва Жанубий Райслип сайлов округидан депутат лавозимига яна ўз номзодини қўймоқчи. Бу ҳақда Sky News хабар берди.
Аксбридж ва Жанубий Райслип консерватив уюшмаси «бўлғуси сайловларда Борис Жонсонни ўзларининг парламентдаги аъзоси ва номзоди сифатида тўлиқ қўллаб-қувватлаши»ни билдирди. Sky News қайд этишича, агар Жонсон қайта сайланишга муваффақ бўлса, келажакда яна партия раҳбарлигига даъвогарлик қилиши мумкин.
Консерватор депутатлар 5 декабрь, душанбага қадар партияга улар 2024 йилда бўлиб ўтиши кутилаётган сайловда қатнашиш-қатнашмаслигини маълум қилиши керак.
Уч йил давомида Британия бош вазири лавозимини эгаллаб келган Борис Жонсон 2022 йил июль ойида, қатор жанжаллардан сўнг истеъфога чиққан эди. Сентябрь бошида Консерваторлар партияси янги сайловлар ўтказди, унда ўша пайтда Британия Ташқи ишлар вазирлигини бошқарган Лиз Трасс ғалаба қозонди. Бош вазир сифатида Трасс номақбул иқтисодий ислоҳотларни таклиф қилди ва 45 кундан кейин истеъфога чиқишга мажбур бўлди. Жонсон яна лавозим учун курашишга уриниб кўриши кутилганди, бироқ у бош вазирликка номзодини қўйишдан бош тортди.
Консерваторлар партияси раҳбари учун навбатдаги сайлов 24 октябрга белгиланган эди, аммо у ўтказилмади, чунки собиқ молия вазири Риши Сунак бош вазирликка ягона номзод бўлиб қолди. Овоз беришдан бироз олдин, асосий рақиб, Жамоатлар палатаси раҳбари Пенни Мордонт Сунакни қўллаб-қувватлаб, ўз номзодини қайтариб олди.