Зеленский Россиянинг Молдовани “босиб олиш режаси” ҳақида гапирди

Украина президенти Владимир Зеленский Брюсселда бўлиб ўтган Европа Иттифоқи саммитида Россия Молдовани босиб олишни режалаштираётгани айтди. 

Зеленский Украина разведкасида тегишли маълумот борлигини айтиб, Молдова президенти Майя Сандуни бу бўйича огоҳлантирганини айтди.

“Яқинда мен Молдова президенти Санду хоним билан гаплашдим ва разведкамизнинг Молдовадаги сиёсий вазиятни йўқ қилиш бўйича қўлга киритган Россиянинг батафсил режаси ҳақида огоҳлантирдим. Россия ҳужжатида ким, қачон ва қандай хатти-ҳаракатлар натижасида Молдовани, бу давлатнинг демократик тартибини бузиб, унинг устидан назорат ўрнатиши кўрсатилган”, — дейди сиёсатчи.

У Молдовага қарши ҳаракатларни бошлаш учун Кремлдан буйруқ берилгани ёки йўқлиги ҳозирча маълум эмаслигини таъкидлади. Зеленский Россия режимининг фақат битта истаги борлиги, бу  Европадаги ҳар қандай эркинликни йўқ қилиш эканини қайд этди.

“Аммо улар Украинага, бошқа давлатларга, хусусан, Европага қарши нима қилмоқчилигини кўрдик. Янгилик йўқ”, — дейди Зеленский.

Аввалроқ Россия ташқи ишлар вазири Сергей Лавров Ғарб давлатлари Молдовани “навбатдаги Украина” сифатида кўраётганини айтганди. Молдова Украинадаги уруш туфайли Россия билан алоқаларни узган. Молдова разведкаси раҳбари Россия қўшинларининг Украина орқали Молдова томон ҳаракатланиши хавфини “реал ва жуда юқори” деб атаган.