Молдова ҳукумати “яшил энергияга ўтиш бўйича жуда амбицияли режа”ни тайёрламоқда, шунинг учун мамлакат Россия гази ва электр энергиясисиз ҳам “омон қолади”, деди республика бош вазири Дорин Речан.
“Омон қолишимиз, Россиядан газ ва электр энергияси олмасдан ҳам тинч яшашда давом этишимиз мумкин. Бу, албатта, юқори нархлар дегани, шунингдек, жамиятнинг заиф қатламлари ва рақобатдан жабр кўрган корхоналар ҳақида қайғуришимиз кераклигини англатади. Бизнес мослашгунча, муайян давр учун компенсация воситаларини топишимиз керак”, — деди ҳукумат раҳбари.
Унинг сўзларига кўра, Молдова ҳукуматида “яшил энергияга ўтиш бўйича жуда катта режа” бор, бу эса “рақобатбардош иқтисодиёт, сармоявий муҳитга кириш” имконини беради.
2022 йил апрель ойида Молдова президенти Майя Санду мамлакат Россия газидан воз кеча олмаслигини, муқобил вариантлар йўқлигини айтганди. Июнь ойида у Россия газдан Молдованинг Европа Иттифоқига қўшилишига йўл қўймаслик учун фойдаланиши мумкинлигини таъкидлади.
2023 йил февраль ойи охирида Инфратузилма ва минтақавий ривожланиш вазири Андрей Спину Молдова Россиядан газга қарамликни тўхтатганини эълон қилди. “Тарихда биринчи марта мамлакатимиз ўнг қирғоғи ‘Газпром’ томонидан етказиб бериладиган газни истеъмол қилмайди. Ўтган йилдан бери захираларни яратамиз ва бир манбага қарамликни тўхташ учун муқобилларни топамиз, деб ваъда бериб келдик. Биз бунга эришдик”, — деди у.
Изоҳ (0)