Витамин комплекслари фақат тўғри қабул қилинган тақдирдагина фойдали. Бизга зарур бўлган барча витамин ва минералларнинг камида учдан икки қисми озиқ-овқатдан олиниши керак, қолган учдан бир қисми эса қўшимча сифатида қабул қилиниши мумкин. Дориларда бўлгани каби синтезланган витаминларни қабул қилишда муайян қоидаларига риоя қилиш лозим, акс ҳолда, улар фойдасиз, ҳатто, соғлиқ учун хавфли бўлиши эҳтимолдан ҳоли эмас.
Мувозанатлаштирилган овқатланиш ўрнига витаминларни қабул қилиш
Витаминлар мувозанатли диетани вақтинча ўрнини босиши мумкин, аммо уларни тўғри овқатланиш билан тўлиқ алмаштириб бўлмайди. Мабодо бирор сабабга кўра сиз турли хил тўйимли таомномага амал қила олмасангиз, витаминлар ва қўшимчаларни қабул қилинг. Мавсумий витамин танқислигини қоплаш учун қўшимча минераллар ичинг, аммо буни доимий стратегияга айлантирманг. Ва қабул қилишдан олдин ҳар доим шифокор билан маслаҳатлашинг.
Витаминларни сақлаш қоидаларини бузиш
Витаминлар бошқа дорилар каби эътибор талаб қилади. Ҳатто, сақлаш ёки қабул қилиш қоидаларининг озгина бузилишидан ҳам уларнинг организмга таъсирини сезиларли даражада ўзгартириши мумкин. Шунинг учун сақлаш қоидаларини диққат билан ўрганиб чиқинг ва ҳар қандай ҳолатда бузманг.
Витаминларни оч қоринга қабул қилиш
Витаминлар ва микроэлементларнинг барчасидан фақат бир нечтаси оч қоринга қабул қилиш учун мос келади. Қолганларнинг ҳаммаси агар оч қоринга қабул қилинган бўлса, кўнгил айниши, қорин оғриғи ва бошқа нохуш ҳолатларнинг келиб чиқишга сабаб бўлади. Витаминларни ҳар доим овқатдан кейин ичган маъқул.
Мос келмайдиганларни бирлаштириш
Агар бирор бир дори-дармонлар билан бир вақтда витаминлар ва биологик фаол қўшимчалар қабул қилсангиз, эҳтиёт бўлинг: уларнинг кўпчилиги дориларнинг таъсирини кучайтириши, заифлаштириши ёки бутунлай “бекор қилиши” мумкин. Алалоқибат, кутганингиздан мутлақо тескари таъсир келиб чиқиши ҳеч гап эмас. Айрим комбинациялар бутунлай ҳалокатли бўлиши мумкин. Дори воситалари ва биологик фаол қўшимчаларнинг ўзаро таъсирини диққат билан ўрганинг ёки даволаниш курси давомида уларни қабул қилишдан бутунлай воз кечинг.
Таҳлиллардан аввал витаминлар ичиш
Анализлар ёки бошқа тиббий тестлардан ўтмоқчи бўлсангиз, биотаҳлилни олишдан камида бир кун олдин ҳеч қандай қўшимчаларни қабул қилмаган маъқул. Шунингдек, шифокорга қайси қўшимчаларни қабул қилаётганингизни айтишингиз керак, чунки уларнинг таъсири кутилмаган лаборатория текшируви натижаларига олиб келиши ва тўғри ташхис қўйишни қийинлаштириши мумкин.
Мавзуга доир:
Изоҳ (0)