АҚШ давлат котиби Энтони Блинкен Остонага ташриф буюриб, мамлакат президенти Қосим-Жўмарт Тўқаев билан учрашди. Бу ҳақда АҚШ давлат департаменти хабар берди.
Тўқаев АҚШнинг Қозоғистон мустақиллиги, ҳудудий яхлитлиги ва суверенитетини доимий қўллаб-қувватлаётгани учун миннатдорлик билдирди. Сиёсатчи дипломатик муносабатлар ўрнатилганидан буён Қозоғистон ва АҚШ ўртасида ҳам икки томонлама, ҳам кўп томонлама ҳамкорлик йўлга қўйилганини таъкидлади.
“Ташрифингиз стратегик ҳамкорлигимизни тўлдиради, деб ўйлайман. Хавфсизлик, энергетика, савдо каби кўплаб стратегик соҳаларда жуда яхши ва ишончли ҳамкорлик алоқаларини ўрнатдик”, — деди Қозоғистон президенти.
Бунга жавобан Энтони Блинкен Остонада эканидан мамнунлигини билдирди ва ташрифни интиқлик билан кутганини таъкидлади.
“Бу ташрифни жуда интиқлик билан кутгандим. Албатта, икки томонлама миқёсда ҳамкорлигимизни чуқурлаштириш ва мустаҳкамлаш борасида 30 йил давомида амалга оширилган ажойиб ишларга таяниш муҳим. Ўйлайманки, сўнгги икки йил ичида бу йўналишда муҳим қадам ташладик. Алоқалар кучли; у фақат кучаяди. Биз бунга содиқмиз.
Умид қиламанки, ҳамкасбларимиз, ташқи ишлар вазирлари билан биргаликда минтақани бирлаштириш, янада мустаҳкам алоқа ўрнатиш, яқиндан ҳамкорлик қилишда давом этамиз. Бу ҳам Марказий Осиё халқлари, ҳам АҚШ учун фойдали бўлади. Биз энг юқори даражада ҳамкорлик қилиш ниятидамиз. Бу ерда бўлганимдан ва ҳамкорлигимизни мустаҳкамлашга ҳисса қўшаётганимдан жуда мамнунман”, — деди Энтони Блинкен.
Ўз навбатида, Тўқаев АҚШ президенти Жо Байденга салом йўллаб, ундан учта мактуб олганини айтди.
“Ҳамкорликда ишлаш борасидаги фикр-мулоҳазаларингизга қўшиламан”, — деди Тўқаев.
Қозоғистон раҳбари АҚШнинг C5+1 форматида ҳамкорликни кенгайтиришга қаратилган саъй-ҳаракатларини олқишлаб, Остона шаҳрида Марказий Осиё давлатлари ва АҚШ ташқи ишлар идоралари раҳбарларининг учрашувини ўтказиш муҳимлигини қайд этди.
Изоҳ (0)