“Путин Германия ва Франция етакчилари билан музокарага тайёр. Бироқ яқин орада улардан ҳеч қандай ташаббус бўлмади” — Песков

Россия президентининг матбуот котиби Дмитрий Песков “Известия” нашрига берган йирик интервьюсида, хусусан, Ғарб давлатлари раҳбарлари билан эҳтимолий музокаралар мавзусига тўхталди.

Песковнинг сўзларига кўра, Россия президенти Владимир Путин Россияга у ёки бу тарзда ўз мақсадларига эришишга ёрдам берадиган ҳар қандай мулоқотга ҳамиша очиқ. “Тинчлик билан — музокаралар столида, лекин бунинг иложи бўлмаган тақдирда, ҳозир кўриб турганимиздек, ҳарбий йўл билан”, — таъкидлади Песков.

Россия президенти матбуот котибининг айтишича, Германия канцлери Олаф Шольц ва Франция президенти Эммануэл Макрон “вазиятдан чиқишнинг бирор йўлини излаш учун Путин билан мулоқотни давом эттиришини” бир неча бор таъкидлаган. Бироқ сўнгги пайтларда улар томонидан ҳеч қандай ташаббус бўлмаган. Хусусан, Кремл матбуот котибининг таъкидлашича, Макрон Путинга қўнғироқ қилишга тайёрлиги ҳақида гапирган бўлса-да, “бундай суҳбат учун ҳеч қандай сўров, йўналиш ёки эҳтимолий шартларни ишлаб чиқиш бўлмаган”.

Шунингдек, Песков Украинада Россия музокара олиб бориши мумкин бўлган кучлар борлигини таъкидлади. “Бу кучларнинг бир қисми, кичик бўлса-да, ҳали ҳам Киевда, бир қисми эса ундан ташқарида. Улардан баъзилари Россияда. Мисол учун, Виктор Медведчук шундай кучларга тегишли, унинг тарафдорлари бор, тўғри, улар биз хоҳлаганчалик кўп эмас”, — деди Песков.

Бироқ, унинг таъкидлашича, музокаралар фақат “махсус ҳарбий операция” мақсадларига эришилгандан кейин муҳокама қилиниши мумкин. “Шу вақтга қадар Украинада бўлганлар учун бирор тарзда бошини кўтариш қўрқинчли ва жисмонан хавфли эди. Улар зудлик билан йўқ қилинади, ўлдирилади”, — деди Россия президенти матбуот котиби.

Кремл сайтида Путин ва Германия канцлери Олаф Шольц ўртасидаги телефон суҳбати ҳақидаги сўнгги хабар 2022 йил 2 декабрда берилган. Улар Россия қўшинларининг Украинага бераётган ракета зарбаларини муҳокама қилишган. Кремл матбуот хизматига кўра, Путин Франция президенти билан охирги марта 2022 йил 11 сентябрда гаплашган. Эммануэл Макрон билан суҳбатнинг асосий мавзуси россиялик ҳарбийлар томонидан босиб олинган Запороже атом электр станциясининг хавфсизлиги бўлган.