Москва Стратегик ҳужум қуролларини қисқартириш ва тарқатмаслик тўғрисидаги шартномада иштирокини давом эттириши учун коллектив Ғарб Россиянинг хавфсизлик муаммоларига муносабатини ўзгартириши керак. Бу ҳақда Россия президенти матбуот котиби Дмитрий Песков “Известия” нашрига берган интервьюсида маълум қилди.
Унинг қайд этишича, биринчи навбатда, АҚШ коллектив Ғарбнинг етакчиси сифатида бу борадаги сиёсатини қайта кўриб чиқиши керак.
“Албатта, шартлар қандайдир тарзда ўзгариши керак. Мамлакатимизнинг ўз хавфсизлиги учун қайғуриши, унинг бўлинмаслиги ҳақидаги тезисларни тушунишда АҚШ бошчилигидаги коллектив Ғарб давлатларининг консептуал ёндашуви ўзгариши керак. Яъни, бир давлат хавфсизлигини бошқа давлат хавфсизлиги ҳисобига таъминлаб бўлмайди”, — деди Песков
Россиянинг Стратегик қуролларни қисқартириш бўйича шартномадаги иштирокини тўхтатиш тўғрисидаги қарори
21 февраль куни Россия Федерал Мажлисига мурожаати чоғида Путин мамлакат бу шартномадаги иштирокини вақтинчалик тўхтатишини эълон қилди. Эртаси куни Россия давлат думаси тегишли қонунни қўллаб-қувватлади. АҚШ давлат котиби Энтони Блинкен бу қарорни “масъулиятсизлик” деб атади. У Вашингтон “Россия аслида нима қилаётганини диққат билан кузатиши” ва хавфсизлик нуқтаи назаридан ҳаракат қилишини билдирди. Британия Путин ўз сиёсий манфаатлари учун глобал хавфсизликни хавф остига қўяётганини таъкидлади.
Изоҳ (0)