Бирлашган Миллатлар Ташкилоти матбуот хизмати маълумотларига кўра, Яманда гуманитар эҳтиёжлар ортиб бормоқда, чунки мамлакат аҳолисининг учдан икки қисмини ташкил қилувчи 21 миллиондан ортиқ одам ёрдам ва ҳимояга муҳтож.
Гуманитар ташкилотлар дунё ҳамжамиятидан 2023 йилда 17,3 миллион яманликка ёрдам бериш учун 4,3 миллиард доллар ажратилишига умид қилмоқда.
“Душанба (27 февраль) куни Женевада Яманни қўллаб-қувватлаш учун маблағ йиғиш мақсадида халқаро донорлар конференцияси бўлиб ўтди. Урушдан вайронага айланган мамлакатдаги 17,3 миллион кишини ҳимоя қилиш учун ёрдам сўрови 4,3 миллиард долларни ташкил этмоқда. Бугунги кунга келиб, Ямандаги гуманитар инқироз дунёдаги энг оғир инқирозлардан бири бўлиб қолмоқда”, — дейилади хабарда.
Ўтган йили олти ойлик сулҳга қарамай, Яман халқи, асосан, иқтисоднинг ёмонлашуви ва ҳаётни таъминлаш тизимларининг вайрон бўлиши туфайли азобланишда давом этмоқда.
“Халқаро ҳамжамият бу инқирозни тугатиш учун куч ва воситаларга эга. Бу бизнинг инсонпарварлик мурожаатимизни тўлиқ молиялаштиришни талаб қилади”, — деди БМТ бош котиби Антониу Гутерриш.
Яман халқи қарийб саккиз йилдан буён Саудия Арабистони қўллаб-қувватлаган ҳукумат кучлари ва “Ансоруллоҳ” (ҳусийлар) исёнчи гуруҳи ўртасидаги жанглар оқибатларидан азият чекмоқда. Кучли қурғоқчилик ва сув тошқинлари ҳам одамлар ҳаёти, хавфсизлиги ва фаровонлигига таҳдид солмоқда.
Бундан ташқари, Яман уруш давом этаётган бошқа мамлакатлардан, асосан Сомали ва Эфиопиядан 100 мингга яқин қочқин ва бошпана изловчиларни қабул қилган.
Бош котибнинг гуманитар масалалар бўйича ўринбосари ва БМТнинг фавқулодда вазиятларда ёрдам кўрсатиш бўйича координатори Мартин Гриффитс маблағ йиғиш конференцияси муҳимлигини таъкидлади.
“Бу тинчликка элтувчи йўлни топиш учун саъй-ҳаракатларни давом эттириш ва ҳатто икки баравар оширишни англатади”, — деди у.
Маблағ йиғиш конференцияси БМТ бош котиби ҳамда Швеция ва Швейцария ҳукуматлари томонидан биргаликда ўтказилган.
“Яман халқини қўллаб-қувватлаш ҳозир ҳар қачонгидан ҳам муҳимроқ”, — деди Швейцария Федерал Ташқи ишлар департаменти раҳбари Ийнацио Кассис.
Швеция халқаро ҳамкорлик ва ташқи савдо вазири Йохан Форссел унинг ҳукумати глобал гуманитар масалаларда ҳамкорликка содиқлигини таъкидлади.
Изоҳ (0)