Жиззах вилояти ИИБ мактабларнинг бирида ўқувчи қизнинг отаси унинг уч нафар синфдошини калтаклагани тасвирланган видеоларга муносабат билдирди.
Ижтимоий тармоқларда Жиззах шаҳридаги 11-мактабда 3 нафар ўқувчини синфдош қизнинг отаси аёвсиз дўппослагани айтилган видео тарқалди.
Аниқланишича, ҳолат ростдан ҳам Жиззах шаҳридаги 11-сонли ўрта умумтаълим мактабида рўй берган ва жабрланган ўқувчининг онаси ҳолат юзасидан ички ишлар органларига мурожаат қилган. Шу асосида ўтказилган суд-тиббий экспертизаси ўқувчи соғлиғининг бузилишига олиб келган тан жароҳати етказилганини тасдиқлаган.
“Газета.уз”нинг туман ИИБ матбуот хизматига таяниб ёзишича, воқеа 31 январь куни содир бўлган, болаларнинг қизга гап отгани ортидан шу ҳолат рўй берган.
Мазкур ҳолат юзасидан фуқаро Б.М га нисбатан Жиноят кодексининг 109-моддаси (Қасддан баданга енгил шикаст етказиш) 2-қисми билан жиноят иши қўзғатилган бўлиб, тергов ҳаракатлари олиб борилмоқда.
Эслатиб ўтамиз, 2022 йилнинг ноябрида Қашқадарё вилоятининг Қамаши туманида 11-синф ўқувчиси депутат ва унинг ўғиллари томонидан ўласи қилиб калтаклангани тўғрисида хабар берилганди.
Изоҳ (1)
izoh mavzu haqida emas. lekin izohlar bo'limi qo'shilganidan xursandman. omad