Афғонистоннинг Нимрўз вилоятидаги маҳаллий манба Эрон чегарачиси “Толибон” кучлари томонидан ҳибсга олиниб, калтакланганини маълум қилди. Бу ҳақда Hasht-e Subh Daily хабар берди.
Маълум қилинишича, Эрон чегарачиси афғон ҳайдовчиси билан нотўғри муносабатда бўлгани учун 27 февраль куни ҳибсга олинган. Жумладан, чегарачи Ипак кўприги чегарасида афғон ҳайдовчисини калтаклагани айтилмоқда. Нимрўздаги “Толибон” манбаси Hasht-e Subh Daily нашрига чегарачи ҳозир уларнинг асирлигида эканини тасдиқлаган.
Etilaatroz нашри чегарачини афғон полицияси “Толибон”га топширгани, Эрон фуқароси ҳозирда қамоққа олинганини айтмоқда.
Эслатиб ўтамиз, 20 февраль куни Афғонистон ва Покистон чегарасидаги Torxам назорат-ўтказиш пунктида “Толибон” жангчилари ва Покистон ҳарбийларининг қуролли тўқнашуви юз берганди. Томонлар бир-бирини оғир ва енгил қуроллардан нишонга олган. Икки томон ўртасидаги қуролли тўқнашув “Толибон” жангчилари Покистон ҳарбий постларидан бирига яқинлашганидан кейин бошланган. Тармоқларда тўқнашув акс этган кадрлар намойиш қилинган.
Изоҳ (0)