Эрон ҳарбийлари илк бор ўзининг Shahed-149 дронининг синов парвозини намойиш қилди. Видео маҳаллий телевидениеда намойиш этилди, Eurasian Times эса Twitter’да унинг парчасини эълон қилди.
Видеода дрон учиш-қўниш йўлагида пайдо бўлиб, осмонга кўтарилгани ва парвозни амалга оширганини кўриш мумкин. “Мешкат” лойиҳаси тадқиқотчилари видео 2022 йилнинг июль ойида, Эроннинг Кошан авиабазасидаги Shahed-149 нинг сунъий йўлдош сурати эълон қилинганида олинган бўлиши мумкинлигини тахмин қилмоқда.
Military Factory веб-сайтига кўра, Shahed-149 Shahed Aviation Industries ва Эрон авиация саноат корпорацияси томонидан ишлаб чиқарилган. У биринчи марта 2021 йил май ойида тақдим этилган ва 2022 йил апрель ойида Эрон Ислом инқилоби қўриқчилари корпусига топширилган.
Shahed-149 Shahed-129 ғоясини давом эттиради ва ташқи кўринишидан АҚШнинг Predator ва Reaper дронларига ўхшайди. Эрон авиақурилмаси соддалаштирилган аэродинамик шаклга эга. Унинг остида 360 градусли кўринишни таъминловчи камераларга эга оптик модул, термал тасвир, инфрақизил сенсор ва лазер масофа ўлчагич ўрнатилган. Shahed-149 разведка ва зарбалар учун ишлаб чиқилган. Ҳарбий мақсаддаги парвоз пайтида у 13 тагача ракета ёки бомба олиб юриши мумкин. Бундан ташқари, дронга радиоэлектрон уруш учун ускуналар ўрнатилиши мумкин.
Shahed-149 нинг маълум хусусиятлари:
- Узунлиги: 10,5 м
- Қанотлари кенглиги: 21 м
- Баландлиги: 3,2 м
- Оғирлиги: 3100 кг
- Тезлиги: 350 км/соат
- Максимал парвоз масофаси: 7000 км
- Умумий парвоз вақти: 35 соатгача
Изоҳ (0)