Россиянинг Санкт-Петербург шаҳрида 50 ёшли ўзбекистонлик эркак ОМОН ходимига икки марта ўқ узди. Бу ҳақда “78.ru” хабар берди.
Маълум қилинишича, ҳодиса 24 февраль куни маҳаллий вақт билан соат 11:30 атрофида Санкт-Петербург марказидаги метро бекатида содир бўлган. Гвардия ходимлари шубҳали кўринган ўзбекистонлик эркакни тўхтатган. У милтиқни олиб, 43 ёшли ОМОН ходимига икки марта ўқ узган, ўқ жабрланувчининг ошқозонига теккан.
Ярадорнинг ҳамкасблари ўқ узган эркакни ўраб олган. Ҳолат юзасидан Россия Жиноят кодексининг 317-моддаси (ҳуқуқни муҳофаза қилиш органи ходимининг ҳаётига тажовуз қилиш) бўйича жиноят иши қўзғатилган. Ўзбекистон фуқароси 20 йилга қамалиши мумкин. Жароҳат олган ходим шаҳардаги тиббиёт муассасаларидан бирига ётқизилган, унга малакали тиббий ёрдам кўрсатилмоқда.
20 февраль куни Қозоғистонда ўзбекистонлик эркак қурол дўконига ҳужум қилиб, отишма содир этганди. Отишмада қўриқчи яраланган, у бармоғидан айрилган. Ўзбекистонлик эркакни тутиш учун полиция ходими унинг оёғига бир неча марта ўқ узган.
Изоҳ (0)