Президент Шавкат Мирзиёев Туркманистонга амалий ташрифи доирасида Грузия бош вазири Ираклий Кобахидзени қабул қилди. Бу ҳақда 5 август куни Президент матбуот хизмати хабар берди.
Учрашувда Ўзбекистон ва Грузия ўртасидаги савдо-иқтисодий, транспорт-логистика ва маданий-гуманитар соҳалардаги ҳамкорликни кенгайтириш масалалари кўриб чиқилган. Грузия бош вазирининг 2025 йил мартдаги Ўзбекистонга ташрифи давомида эришилган келишувларни амалга ошириш натижалари тўғрисида сўз борган.
Фаол идоралараро алоқалар давом этмоқда, ташқи ишлар ва иқтисодиёт вазирларининг учрашувлари ўтказилди. Товар айирбошлаш ва юк ташиш ҳажми, қўшма лойиҳа ва корхоналар сони ошмоқда. Ўзаро товар етказиб беришни кўпайтириш, қишлоқ хўжалиги, тўқимачилик, электротехника, фармацевтика, озиқ-овқат тармоқларида, шунингдек, логистика соҳасида кооперация лойиҳаларини илгари суриш бўйича мувофиқлаштирилган чоралар кўриш муҳимлиги қайд этилди, дейилади манбада.
Ираклий Кобахидзе мартдаги Ўзбекистонга ташрифи чоғида икки давлат ўртасида қатор келишувларга эришилган. Жумладан, рақамлаштириш ва туризм инфратузилмасини ривожлантириш бўйича шерикликни кенгайтиришга алоҳида эътибор қаратилган.
Учрашувда 2024 йилда Ўзбекистон ва Грузия ўртасидаги товар айирбошлаш ҳажми 50 фоизга ошгани айтилган. Икки давлат ҳамкорлигида ташкил этилган қўшма корхоналар сони ва юк айланмаси ҳажми кўпайгани маълум қилинган. Пойтахтлар ўртасида тўғридан-тўғри авиарейслар амалга оширилаётгани, Ўзбекистонда грузиялик инвесторлар иштирокида рақамли банк фаолият юритаётгани таъкидланган.
Изоҳ (0)