Польша ички ишлар ва маъмурият вазири Мариуш Каминский Беларусь билан чегарадаги Бобровники назорат-ўтказиш пункти ёпилганини маълум қилди. Каминскийнинг таъкидлашича, бундай қарор “давлат хавфсизлиги манфаатларидан келиб чиққан ҳолда” қабул қилинган. Ўтказиш пункти 10 февраль куни тушдан кейин ишлашдан тўхтайди.
Бобровники назорат-ўтказиш пункти (Беларусь томонида Брестовица) Гродно вилоятидаги асосий, Польша—Беларусь чегарасидаги энг йирик чегара пунктларидан бири. 2022 йил декабрь ойида, Польша Давлат чегара хизмати маълумотларига кўра, ушбу назорат-ўтказиш пункти орқали икки йўналишда деярли 111 минг киши ўтган.
Аввалроқ Польша Половце (Песчатка) ва Славатиче (Домачево) чегара пунктларини ёпган эди. Бундан ташқари, 2021 йилнинг кузидан бери Кузница Белостоцкая (Брузги) назорат-ўтказиш пункти ишламаяпти.
2022 йилнинг кузида Польша ва Болтиқбўйи мамлакатлари туристик визаси бўлган россияликлар учун ўз чегаралари орқали ўтиш йўлини ёпганди. Бир қатор Европа давлатлари ҳам Россия ва Беларусь фуқароларига Шенген визаларини беришни тўхтатди.
Изоҳ (0)