Афғонистонда “ислом динига ва мамлакат манфаатларига зид” китоблар мусодара қилинади, деди “Толибон” ҳукуматининг Ахборот ва маданият вазирлиги матбуот котиби Абдулҳақ Ҳамид. Бу ҳақда TOLOнеwс телеканали хабар бермоқда.
Таъкидланишича, нашриётлар номақбул деб топилган минглаб китобларни Ахборот ва маданият вазирлигига топширишни бошлаган.
“Бозорда ҳали ҳам исломга, ислом тамойилларига зид ёки секуляризм каби бошқа мафкураларни тарғиб қилувчи юзлаб китоблар мавжуд. Шунингдек, ёшларнинг ахлоқини бузувчи китоблар ҳам бор”, — дейди вазирлик матбуот котиби.
Афғонистон нашриёти ва китоб сотувчилари иттифоқининг таъкидлашича, “Толибон” томонидан номақбул деб топилган китоблар чет эл ҳарбийлари мамлакатда бўлган 20 йил давомида Афғонистонга олиб келинган ёки нашр этилган.
Ташкилот Афғонистонда бундай китобларнинг нашр этилишини тўхтатиш чораларини кўришга ваъда берди.
“Биз миллий тарангликни, сиёсий муаммоларни ва мамлакатни инқирозга олиб келадиган бўлинишни кучайтирувчи китобларни бошқа нашр этмасликка ҳаракат қиламиз”, — деди Афғонистон ноширлар ва китоб сотувчилар уюшмаси раҳбари Сайид Аҳмад Саид.
“Биз Нашриётлар уюшмаси ҳамда Ахборот ва маданият вазирлиги томонидан тасдиқланадиган ҳар қандай буюртмани бажаришга тайёрмиз. Бундай китобларни (ҳозир “Толибон” номақбул деб ҳисоблаётган) биз ҳеч қачон нашр қилмаганмиз”, — деб ишонтирди ноширлардан бири.
2021 йил август ойида ҳокимиятни қўлга киритганидан сўнг, “Толибон” Афғонистонда сўз ва маданият эркинлигини чеклаш учун изчил равишда турли чоралар кўрди. Ҳукмронлигининг бошида “Толибон” ўнлаб журналистларни қамоққа олган. Баъзилари кейинроқ озод қилинди, бироқ қолганлари ўз касби, хусусан, толибларни танқид қилгани учун узоқ муддат қамоқ жазосига ҳукм қилинди.
Изоҳ (0)