Афғонистонда “Толибон” ҳукумати собиқ хорижий ҳарбий базаларнинг бир қисмини махсус иқтисодий зоналарга айлантиришни режалаштирмоқда. Бу ҳақда BBC ва Reuters хабар берди.
Афғонистондаги иқтисодий вазият “Толибон” 2021 йилнинг августида мамлакатда ҳокимиятни қўлга олганидан кейин ёмонлаша бошлади. Бунинг асосий сабабларидан бири Афғонистонга 2000 йилларнинг бошидан бери ёрдам бериб келаётган асосий донор давлатларнинг “Толибон” билан ҳамкорлик қилишдан бош тортиш эди. Шунингдек, халқаро ташкилотларнинг аксарияти мамлакатдаги фаолиятини тўхтатди.
Афғонистон бош вазирининг иқтисодий масалалар бўйича ўринбосари Мулла Абдул Ғани Барадар 20 йилдан бери хорижий контингентлар жойлашган бир қатор собиқ ҳарбий базаларни ўзгартириш режаларини маълум қилди.
“Афғонистон Саноат ва савдо вазирлиги хорижий кучларнинг айрим ҳарбий базаларини махсус иқтисодий зоналарга айлантириш учун уларни босқичма-босқич назоратга олиши керак, деган қарор қабул қилинди”, — деди Барадар.
У лойиҳа пойтахт Кобул ва шимолий Балх вилоятидаги базалардан бошланишини қўшимча қилди, бироқ тафсилотларни келтирмади.
Мутахассисларнинг фикрича, Афғонистонда 1 триллион доллардан ортиқ табиий ресурслар, жумладан, табиий газ, мис ва ноёб ер жинслари мавжуд. Бироқ бу захираларнинг аксариятидан мамлакатда ўнлаб йиллар давом этган беқарорлик туфайли фойдаланилмаяпти.
Аввалроқ “Толибон” Афғонистон шимолида нефть қудуқларини бурғулаш бўйича Хитой фирмаси билан шартнома имзолашни режалаштираётганини маълум қилганди. 25 йиллик шартнома Хитойнинг минтақадаги иқтисодий иштирокини назарда тутади.
Пекин бошқа барча давлатлар сингари “Толибон” ҳукуматини расман тан олмаган, бироқ Хитойнинг “Бир камар, бир йўл” ташаббуси учун муҳим минтақанинг марказида жойлашган Афғонистонда унинг асосий манфаатлари ётибди.
2013 йилда Си Цзиньпин томонидан бошланган ташаббус ривожланаётган мамлакатларга портлар, йўллар ва кўприклар каби инфратузилмани қуриш учун маблағ ажратади.
Изоҳ (0)