“Дарё” нашри 21 февралда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россия ва АҚШ муносабатлари қайта тикланадими?
АҚШ Давлат департаменти мамлакат раҳбари Жо Байденнинг Россия президенти Владимир Путин билан учрашиш шартини маълум қилди. Бу ҳақда BBC хабар берди.
“Албатта, бунинг учун Украинага қарши тажовуз тугашини кўришимиз керак. Украинада уруш давом этаётганда бу даражада дипломатик музокаралар олиб бориш жуда қийин”, — дейди Департамент матбуот котиби Андреа Каплан.
Каплан президент Байден ҳар қандай етакчи билан учрашишга тайёрлигини, аммо бу АҚШ манфаатларига мос келиши кераклигини эслатди. “Бу тўлиқ дипломатик суҳбат бўлиши керак”, — деди Каплан ва Байденнинг ҳозирда Путин билан учрашиш режаси йўқлигини қўшимча қилди.
Шунингдек, расмий АҚШ нафақат Путин билан, балки Россиянинг бошқа вакиллари билан ҳам учрашув ўтказишга ҳозирча тайёр эмаслигини таъкидлади.
“Россия Украинада уруш олиб бораётган пайтда бунинг иложи йўқ. Бундай агрессияга, Россия дипломатияга ҳали тайёр эмаслигига гувоҳ эканмиз, учрашувдан маъно йўқ”, — деди Каплан.
Бахмут учун мудофаа чизиғига одамлар тўлқинини ташлаш услуби...
Эслатиб ўтамиз, аввалроқ НАТО бош котиби Йенс Столтенберг Путин тинчликни хоҳламаслиги ва у аллақачон Бахмут ҳудудида янги ҳужум амалиётларини бошлаганини айтди.
“Бу йирик баҳорги ҳужумми ёки шунчаки унинг муқаддимасими, айтиш қийин. Лекин улар тобора кўпроқ қўшин ва кўпроқ қурол-яроғларни тортиб келмоқда”, — деган НАТО бош котиби.
Столтенбергнинг қўшимча қилишича, Россия ҳарбий хизматчилар сонини ошириш билан қониқарсиз жиҳозлар ва ёмон логистика таъминотини хаспўшлашга ҳаракат қилмоқда.
Алянс вакили буни “мудофаа чизиғига одамлар тўлқинини ташлаш” деб атади.
Бугун эса Украина разведкаси Россия талабаларни оммавий сафарбар қилишга тайёрланаётгани ҳақида хабар бериб, далил сифатида Томск давлат педагогика университети раҳбариятига тегишли 9 февралдаги буйруқнинг нусхасини эълон қилди. Воқеалар ривожини кузатамиз.
Афғонистон ортиқ беқарор вазият туфайли иқтисодий имкониятларидан чекланишни хоҳламайди, бу йўлда унинг қўллаб-қувватловчиси ким бўлади?
Афғонистонда “Толибон” ҳукумати собиқ хорижий ҳарбий базаларнинг бир қисмини махсус иқтисодий зоналарга айлантиришни режалаштирмоқда. Бу ҳақда BBC ва Reuters хабар берди.
Афғонистондаги иқтисодий вазият “Толибон” 2021 йилнинг августида мамлакатда ҳокимиятни қўлга олганидан кейин ёмонлаша бошлади. Бунинг асосий сабабларидан бири Афғонистонга 2000 йилларнинг бошидан бери ёрдам бериб келаётган асосий донор давлатларнинг “Толибон” билан ҳамкорлик қилишдан бош тортиши бўлди. Шунингдек, халқаро ташкилотларнинг аксарияти ҳам мамлакатдаги фаолиятини тўхтатди.
Айни пайтда Афғонистон бош вазирининг иқтисодий масалалар бўйича ўринбосари Мулла Абдул Ғани Бародар хорижий кучларнинг айрим ҳарбий базаларини махсус иқтисодий зоналарга айлантириш учун уларни босқичма-босқич назоратга олиш кераклиги ҳақидаги қарорни маълум қилди.
Лойиҳа пойтахт Кобул ва шимолий Балх вилоятидаги базалардан бошланади.
Мутахассисларнинг фикрича, Афғонистонда 1 триллион доллардан ортиқ табиий ресурслар, жумладан, табиий газ, мис ва ноёб ер жинслари мавжуд. Бироқ бу захираларнинг аксариятидан мамлакатда ўнлаб йиллар давом этган беқарорлик туфайли фойдаланилмаяпти.
Аввалроқ “Толибон” Афғонистон шимолида нефть қудуқларини бурғулаш бўйича Хитой фирмаси билан шартнома имзолашни режалаштираётганини маълум қилганди. Ўз-ўзидан 25 йиллик шартнома Хитойнинг минтақадаги иқтисодий иштирокини назарда тутади.
Пекин бошқа давлатлар сингари “Толибон” ҳукуматини расман тан олмаган бўлса-да, бироқ Хитойнинг “Бир камар, бир йўл” ташаббуси учун Афғонистонда унинг асосий манфаатлари ётади.
2022 йил якунига кўра, ўзбекистонликларнинг салкам 1,5 млн нафари Россияга ишлашга кетди, сабаблар билан танишамиз
Россияга 2022 йилда ишлаш учун келган хорижий фуқаролар сони 3,47 миллион кишини ташкил этди. Мазкур кўрсаткич ўтган йилга нисбатан 33 фоизга кўпдир. Бу ҳақда Finexpertiza аудит ва консалтинг тармоғи таҳлилий хизматига таяниб, “ТАСС” хабар бермоқда.
Ўзбекистон фуқаролари Россияга келган барча меҳнат муҳожирлари орасида етакчи бўлди — 1,45 млн ўзбекистонлик 2022 йилда Россияга борган. Бу кўрсаткич бир йилда ишлаш учун келган умумий муҳожирлар сонига нисбатан 41,9 фоизни ташкил қилади.
Тожикистон фуқаролари (28,4 фоиз ёки 986,7 минг киши) иккинчи бўлган бўлса, учинчи ўринни Қирғизистондан келган муҳожирлар (16,2 фоиз ёки 562,6 минг киши) эгаллади.
2022 йилда коронавирусдан олдинги давр билан солиштирганда, Россияга келган хорижликларнинг умумий сони 2,5 баравар кам бўлган, меҳнат муҳожирлари сони эса сезиларли даражада камроқ — атиги 15,3 фоизга (ёки 626 минг киши) қисқарган.
Мутахассислар кадрлар етишмаслиги фонида курерлар, ҳайдовчилар, қурувчилар ва юк кўтарувчиларнинг иш ҳақи рублнинг мустаҳкамланиши фонида жозибадорликка эга бўлганини таъкидлади. Натижада муҳожирлар учун хорижий валютадаги даромадлар сезиларли даражада ошган.
Изоҳ (0)