Атом энергияси бўйича халқаро агентлик (МАГАТЭ) инспекторлари Эронда уранни бойитиш даражаси 84 фоизга етганини аниқлади, бу ядровий қурол яратиш учун зарур бўлган даражадан атиги 6 фоиз паст, деб хабар бермоқда Bloomberg.
МАГАТЭ ходимлари эронлик мутахассислар қандай қилиб 84 фоиз софликда бойитилган уранни тўплаганини текширмоқда.
Инспекторлар Эрон ушбу материални атайлаб ишлаб чиқарганми ёки у концентрация изотопларни ажратиш учун ишлатиладиган центрифугаларда беихтиёр тўпланганми, буни аниқлаш устида ишламоқда.
Аввал Эрон ҳукумати атом заводида уранни 60 фоизгача бойитаётганини таъкидлаган. 2015 йилги халқаро ядровий келишув шартларига кўра, Эрон уранни 3,67 фоиздан ортиқ бойитиш ҳуқуқига эга эмас. Ядро қуролини ишлаб чиқариш учун уранни 90 фоизгача бойитиш зарур.
Эрон билан ядровий келишувнинг издан чиқиши
Халқаро ядровий битим бир неча йил олдин АҚШ (ўша пайтда президент Дональд Трамп бўлган) ундан бир томонлама чиқиб кетганидан кейин ўз фаолиятини тўхтатди. Ўшандан бери ушбу келишувни сақлаб қолиш учун уринишлар бўлган, аммо улар ҳеч бири натижа бермади.
Яқинда Эронда эълон қилинмаган учта жойда уран излари топилди. Шу муносабат билан, МАГАТЭ Бошқарувчилар кенгаши 17 ноябрь куни АҚШ ва “евроучлик”нинг Ядро қуролини тарқатмаслик тўғрисидаги келишув бўйича мажбуриятларни бажаришга чақирувчи резолюциясини қабул қилди.
Бундан ташқари, МАГАТЭ Эрондан эълон қилинмаган объектларда топилган ядровий материалларнинг келиб чиқишини зудлик билан тушунтиришни, ҳужжатларни тақдим этишни ва уларга киришни талаб қилди. Теҳроннинг Фордодаги заводда уранни 60 фоизгача бойитиш қарори ушбу резолюцияга жавобан қабул қилингани айтилмоқда.
Изоҳ (0)