Украина учун Донецк вилоятидаги Бахмут шаҳрини ҳимоя қилиш муҳим (шаҳар учун шиддатли жанглар давом этмоқда), аммо украиналиклар бу мантиқан тўғри бўлгандагина, фронтнинг ушбу секторида жанг қилади. Бу ҳақда мамлакат президенти Владимир Зеленский Италия матбуотига берган интервьюсида айтиб ўтди.
“Бу унчалик катта шаҳар эмас. Руслар томонидан вайрон қилинган Донбассдаги кўплаб бошқа шаҳарлар билан бир хил. Биз учун уни ҳимоя қилиш муҳим, лекин ҳар қандай йўқотиш эвазига эмас, ҳамманинг ўлими баҳосига эмас. Ҳозирча бу мантиқан тўғри экан, курашаверамиз. Биз қаршилик кўрсатмоқдамиз ва, шу билан бирга, навбатдаги қарши ҳужумга тайёргарлик кўряпмиз”, — деди Зеленский Бахмут ҳимояси одамларни йўқотишга арзийдими, деган саволга жавобан.
Украина етакчисининг қайд этишича, Россия кучлари Бахмутни қўлга олиб, сўнг Краматорск ва Славянскка — “иложи бўлса, Донбасс чегараларигача ва Днепргача” ҳужумни давом эттирмоқчи.
Журналистлар, шунингдек, Зеленскийдан агар уруш давом этса, Украина оёқда туриб бера оладими ёки йўқлигини сўради. Бунга жавобан у Киев қисқа муддатли урушга ва ўзининг ғалабасига ҳозирлик кўраётганини айтди.
“Қанчалик тез бўлса, қурбонлар шунчалик кам бўлади. 2014 йилда можаро музлатилганди ва бу бизга фойда келтирмади. Минск келишувлари Путинга ўтган йилги кутилмаган ҳужумга тайёргарлик кўриш учун вақт берди, биз ортиқ тузоққа тушмаймиз. Бизнинг аскарларимиз ўз оилаларини, уйларини ҳимоя қилаётгани учун шижоатга тўлган”, — дея қўшимча қилди Украина президенти.
Бахмут шаҳри ҳозир фронтнинг энг қайноқ нуқтасидир. Россия томонида асосан “Вагнер” ёлланма аскарлари урушаётган шаҳар учун жанглар 2022 йил июль ойидан бери давом этмоқда.
Ҳарбий таҳлилчиларнинг таъкидлашича, Россия учун Бахмутнинг қўлга олиниши кўпроқ рамзий ва сиёсий аҳамиятга эга, аммо стратегик нуқтаи назардан муҳим эмас.
Январь ойи ўрталарида Германия Федерал разведка хизмати Украина армияси Бахмут яқинидаги жангларда ҳар куни “уч хонали сонларда” аскарларини йўқотаётгани ҳақида хабар берди.
Изоҳ (0)