Хитой Ташқи ишлар вазирлиги АҚШ Россияга қурол сотиш бўйича “маъруза ўқишга ҳаққи йўқ”лигини маълум қилди. Бу ҳақда CNN хабар берди.
АҚШ расмийлари Хитой Россия армиясига “ўлимга олиб келувчи ёрдам” кўрсатиш ҳақида хавотир билдирганди. Хитой Ташқи ишлар вазирлиги матбуот котиби Ван Венбин “жанг майдонини доимий равишда қурол-яроғ билан таъминлаётган Хитой эмас, АҚШ” эканини таъкидлади.
“Америка томонининг Хитойга маъруза ўқишга ҳаққи йўқ ва биз ҳеч қачон АҚШга Хитой-Россия муносабатларига диктация қилишига ёки ҳатто босим ўтказишига йўл қўймаймиз. Ким диалог ва тинчликка чақирмоқда, ким пичоқ бериб, қарама-қаршиликка даъват қилмоқда?” — деди дипломат.
Ван Венбин Хитой Украинадаги “можаро”ни ҳал қилиш учун “тинчликка чақириш ва музокараларни илгари суриш”да давом этишини ҳамда “вазиятни пасайтириш ва совутишга ёрдам беришда конструктив рол ўйнашга” қатъий қарор қилганини қўшимча қилди.
Аввалроқ CNN Хитой гўёки қўш ўйин ўйнаётгани ҳақида хабар берганди. Омма олдида Пекин тинчлик тарафдори, бироқ Хитой Россияга яширинча ҳалокатли қуроллар етказиб беришга тайёрланаётгани ҳақида “огоҳлантирувчи” сигналлар мавжудлигини маълум қилганди.
Бунга жавобан АҚШ Давлат котиби Энтони Блинкен Украинада ишлатиш учун Россияга ҳалокатли қуроллар берилса, Хитой жиддий оқибатларга олиб келишини айтди. Унинг сўзларига кўра, бу жавоб чораларига тайёр бўлган АҚШ билан муносабатларга таъсир қилади.
Изоҳ (0)