Россия Хавфсизлик кенгаши котиби ўринбосари Дмитрий Медведев АҚШ президенти Жо Байденнинг Украинага ташриф буюрганига муносабат билдирди. Сиёсатчи ўзининг Telegram каналида бу ҳақда пост қолдирди.
Медведевнинг сўзларига кўра, АҚШ президенти хавфсизлик кафолатларини олган. Сиёсатчи Украинанинг асосий муаммоси қурол-яроғ етказиб бериш ва Ғарбнинг ваъдаси эмаслиги, балки одамларнинг хорижга чиқиб кетишида эканини айтди.
“Турли экспертларнинг ҳисоб-китобларига кўра, жами 15 дан 20 миллионгача одам Украинадан кетган”, — дейди Хавфсизлик кенгаши раиси ўринбосари.
Шунингдек, у ҳозир Украинада 20-25 миллиондан ортиқ одам яшаши ва бу рақам “камайиш тенденциясида” эканини қўшимча қилди.
“Демак, албатта, танклар ва снарядлар муҳим. Лекин одамлар бунданда муҳимроқдир. Уларнинг оммавий равишда кетиши келажак кимга тегишли деган саволга жавоб бўлади”, — деб ёзган Медведев.
АҚШ президентининг миллий хавфсизлик бўйича маслаҳатчиси Жейк Салливан Байденнинг Киевга ташрифи ҳақида Россия хабардор қилинганини айтди.
“Можаро юзага келмаслиги учун президент Байден Киевга жўнаб кетишидан бир неча соат олдин Россияни хабардор қилгандик”, — деди Салливан.
20 февраль куни Жо Байден Киевга Владимир Зеленский билан учрашиш учун келгани маълум бўлди. Ҳаво ҳужумидан огоҳлантириш тизими садолари остида у София майдонида ҳалок бўлган ҳимоячилар хотирасига ҳурмат бажо келтирди. The New York Times нашри Байденнинг Киевга махфий сафари қандай тайёрлангани ҳақида маълумот берди.
Изоҳ (0)