АҚШ собиқ давлат котиби Генри Киссинжер Украинанинг «нейтрал» мақоми ғоясидан воз кечди. Унинг сўзларига кўра, уруш бошланганидан кейин Украина НАТО таркибига кириш ҳуқуқини қўлга киритган. Бу ҳақда у Давосдаги форумда сўзлаган нутқида гапирди.
«Урушдан олдин мен Украинанинг НАТОга аъзо бўлишига қарши эдим, чунки ҳозир биз гувоҳ бўлаётган ҳодисаларнинг бошланишидан қўрқардим. Ҳозир бу жараён шундай даражага етгани сабабли, ушбу шароитда нейтрал Украина ғояси энди мантиқий эмас. Охир-оқибат, у НАТОдан қандай шаклда бўлса ҳам кафолатлар олиши керак. Энди Украинанинг НАТОга кириши мақбул йўл», — деди у.
Бир ой олдин Киссинжер The Spectator журнали учун мақола ёзиб, Украинадаги урушни «тинч йўл билан ҳал қилишни» таклиф қилган эди. У ўзининг бир нечта вариантини тақдим этди: масалан, халқаро назорат остида Россия томонидан босиб олинган ҳудудларда референдумлар ўтказиш ёки Украинанинг 24 февралгача бўлган чегараларига қайтиши каби.
«Киссинжернинг истеъдоди, тажрибаси ва таҳлилига ҳар доим талаб бор, айниқса, бундай кескин вазиятларда. Биз ушбу материални катта қизиқиш билан ўрганамиз. Ҳозирча, афсуски, бундай имконият йўқ», — деган Россия президентининг матбуот котиби Дмитрий Песков ўшанда.
Киссинжер 1973—1977 йилларда АҚШ Давлат котиби лавозимида ишлаган. 1973 йилда у Вьетнамдаги урушни вақтинча тўхтатган Париж тинчлик келишувига эришишдаги роли учун Нобель мукофотига сазовор бўлган.
Изоҳ (0)