“Дарё” нашри 17 февралда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россиянинг баҳорга прогноз қилинган ҳужуми бошландими?
Россия армиясининг Украинага аввал прогноз қилинган баҳорги ҳужуми бошланди, деб маълум қилди Владимир Зеленский BBC билан суҳбатда.
“Россия ҳужумлари аллақачон бир неча йўналишда амалга оширилмоқда”, — деди Украина президенти.
Унинг таъкидлашича, Украина Қуролли кучлари ўзлари қарши ҳужумга ўтгунча Россия ҳужумларини қайтариб туради. Лекин бунинг учун Украинага кўпроқ Ғарб қуроллари керак. “Қурол — бу Россия тушунадиган ягона тил”, — деди Зеленский.
Бундан ташқари, у Украина Владимир Путин билан ҳеч қандай ҳудудий ён бериш ёки муросага бормаслигини айтди.
“Бугун бизнинг омон қолишимиз, бирлигимиз ягона мақсад. Биз Европа томон кетяпмиз, Украина шу йўлни танлади. Украина хавфсизлик кафолатларини хоҳлайди. Шундай экан, ҳар қандай ҳудудий муроса давлатимизни заифлаштиради. Гап ъмуросаъ сўзида эмас. Савол ким билан муроса қилишда. Путин биланми? Йўқ! Нега? Чунки унга ишонч йўқ”, — дейди Зеленский.
Украиналик учувчилар ғарб қирувчи самолётларидан фойдаланишга ўргатилади
Украина ҳозирча ҳеч бир давлатдан жанговар самолётлар етказиб бериш бўйича ваъда олмади. Бу ҳақда мамлакат ташқи ишлар вазири Дмитрий Кулеба Германиянинг Funke медиа гуруҳи ва Франциянинг Ouest-France газетасига берган интервьюсида маълум қилди.
“Шу пайтгача ҳеч бир давлат қирувчи самолётлар етказиб бериш мажбуриятини олгани йўқ. Аммо Буюк Британия сингари айрим ҳукуматлар украиналик учувчиларни Ғарб қирувчиларига ўргатиши ҳақида эълон қилган”, — деди Кулеба.
Унинг сўзларига кўра, қирувчилар душман ракеталарини уриб тушириш орқали Украина ҳаво мудофаасини қўллаб-қувватлаши мумкин эди. Бундан ташқари, улар “қарши ҳужум учун” муҳим аҳамиятга эга. “Бизни биринчи навбатда, АҚШ, Буюк Британия, Франция ва Германия қирувчилари қизиқтирмоқда”, — деди вазир ва бу давлатлар “энг юқори ишлаб чиқариш қувватлари ва энг йирик самолёт паркларига” эга эканини таъкидлади.
Россия ва Украина нима учун урушни дипломатик йўл билан ҳал қила олмаяпти?
Дмитрий Кулеба айни дамда Украинадаги урушни дипломатик йўл билан тугатишнинг иложи йўқ, деган фикрни ҳам билдирди.
“Менга дипломатик ташаббуслар орқали тинчликка эришмоқчи бўлганлар ёқади, чунки ўзим дипломатман. Лекин бундай ташаббусни қандай қилиб амалга ошириш мумкин? Тинчлик нархи Россиянинг босиб олинган ҳудудларда қолишига тенг бўладими?” — сўради Украина ташқи ишлар вазири риторик тарзда.
“Россия билан ҳар қандай музокаралар аввалида қуйидагича бўлиши керак: Украинанинг ҳудудий яхлитлиги тўлиқ тикланиши шарт. Буни музокара қилиб бўлмайди”, — деди у.
Кулебанинг сўзларига кўра, тинчлик ва дипломатия тарафдорларининг кўпчилиги “аслида фақатгина Украина Россиядан мағлуб бўлишини хоҳлайди”.
Тамагирлик йўли билан пора олганликда гумонланаётган судьяга нисбатан жиноят иши қўзғатилди
Тошкент шаҳар Яшнобод тумани суди судьясига нисбатан жиноят иши қўзғатилади. Бу ҳақда Судьялар олий кенгаши хабар қилди.
Қайд этилишича, 17 февраль куни кенгашнинг навбатдан ташқари йиғилиши бўлиб ўтган. Унда бош прокурорнинг Тошкент шаҳар жиноят ишлари бўйича Яшнобод туман суди судьяси И.Б.ни Жиноят кодексининг 210-модда 2-қисми “в” банди (тамагирлик йўли билан пора олиш) билан жиноий жавобгарликка тортишга оид тақдимномаси муҳокама қилинган.
Кенгаш хулосаси билан И.Б.ни жиноий жавобгарликка тортишга розилик берилган ва унинг судьялик ваколати тўхтатилган.
“Тергов сири ва айбсизлик презумпсияси талабларидан келиб чиқиб, бошқа тафсилотлар ошкор қилинмайди”, — дейилади хабарда.
Маълумот учун, юқоридаги жиноятни содир этганликда айбдор деб топилган шахс беш йилдан ўн йилгача озодликдан маҳрум қилиш билан жазоланади.
Изоҳ (0)