Пенсилвания университети ва Пиза университетининг археологик гуруҳи Ироқ жанубида тахминан 5000 йиллик деб баҳоланаётган қовоқхона қолдиқларини топди. Бу ҳақда Phys.org портали хабар бермоқда.
Қадимий бино ҳозирги Насирия шаҳрининг шимоли-шарқида жойлашган қадим шумерларнинг Лагаш шаҳри харобалари ўрнида бўлган. Қазишмалар натижасида ибтидоий музлаткич тизими қолдиқлари, катта тандир, ташриф буюрувчилар учун ўриндиқлар ва 150 га яқин косалар топилди. Идишларда балиқ ва ҳайвонларнинг суяклари қолган, шунингдек, шумерлар орасида кенг тарқалган пиво истеъмоли ҳақида далиллар мавжуд.
Мутахассисларнинг фикрига кўра, бу муассаса оддий одамлар учун мўлжалланган бўлиб, у ерда аҳоли овқатланган ва майхўрлик қилган бўлиши мумкин.
Лагаш дунёнинг дастлабки шаҳарлардан ҳисобланади, унда қишлоқ хўжалиги маҳсулотларининг ортиб қолиши янги ижтимоий синфларнинг пайдо бўлишига имкон берган. Шаҳар аҳолиси деҳқончилик, чорвачилик, балиқчилик, шунингдек, товар айирбошлаш билан шуғулланган.
Келгусида топилмалар таҳлил қилиниб, милоддан аввалги 2700 йилларда қовоқхоналардан фойдаланган оддий одамларнинг фаолияти ҳақида кўпроқ маълумот олиш режалаштирилмоқда.
Изоҳ (0)