Украина Миллий хавфсизлик ва мудофаа кенгаши котиби Алексей Данилов Украина фуқаролигидан маҳрум этилган, собиқ депутат Виктор Медведчук Россия президенти Владимир Путинга уруш бўйича “Б режа”ни таклиф қилганини айтди. Бу ҳақда Данилов BBC’га берган интервьюсида маълум қилди.
Даниловнинг сўзларига кўра, Россия Украинани тўлиқ қўлга кирита олмаслигини аллақачон англаб етган.
“Россияда ҳозирда корейс вариантни яратишни режалаштирмоқда. Кремлдагилар Украинани тўлиқ эгаллаб ололмаслигини англаб етган ва энди иккинчи Украина деб аталган Б режасини тузади”, — деди расмий.
У мазкур режа собиқ Олий Рада депутати ва “Мухолифат платформаси — ҳаёт учун” россияпараст партияси сиёсий кенгаши собиқ раҳбари Виктор Медведчук томонидан тақдим этилганини таъкидлади.
“Ақлдан озган мазкур режани Медведчук илгари сурган. У ўзини Украинада профессионал одам деб ҳисоблайди, лекин ундай эмас, у шунчаки хоин”, — таъкидлади Украина Миллий хавфсизлик ва мудофаа кенгаши котиби.
Данилов Россиянинг мақсади яқин келажакда Донецк ва Луганск вилоятларини Қримга қуруқлик йўлаги билан бирга тўлиқ босиб олиш, кейин эса Украинани бўлиб ташлаш ғоясини амалга ошириш эканини айтди.
Украина сиёсатчиси ва Владимир Путиннинг “қадрдони”, Украинага хиёнатда айбланаётган Виктор Медведчук Россия босқинидан кўп ўтмай ҳибсга олинган. Сентябр ойида у ва яна 55 нафар рус аскари украиналик ҳарбий асирларга алмаштирилган. Узоқ вақт давомида Медведчукнинг Россиядаги тақдири ҳақида ҳеч нарса маълум эмас эди, лекин 2023 йилнинг январь ойида у Россиянинг "Известия" газетасида сиёсий мақола эълон қилди, унда у Ғарбни ва Украина ҳукуматини Россия билан уруш бошлаганликда айблади.
Изоҳ (0)