Европа Иттифоқи Россия дизели учун 100 долларлик нарх чегарасини белгилашга келишиб олди

Европа Иттифоқи давлатлари Россия дизелининг бир баррели учун 100 доллардан, чегирма билан сотиладиган маҳсулотлари учун эса 45 доллардан нарх чегарасини белгилашга келишиб олди. Бу ҳақда Bloomberg хабар берди. 

Еврокомиссия раҳбари Урсула фон дер Лайен Twitter’да ЕИ G7 мамлакатлари билан биргаликда нархнинг юқори чегарасини жорий қилаётганини билдирди.

“G7 билан биргаликда биз Россияни даромаддан маҳрум қилиб, бу маҳсулотларга юқори нархларни жорий қилмоқдамиз. Лекин глобал энергия бозорларининг барқарорлигини таъминлаймиз”, — деди у. 

Унинг постида нарх чегарасининг аниқ миқдори ҳақида маълумот берилмаган.

Россиядан нефть маҳсулотлари учун чекловлар 5 февралдан кучга киради. Ўтган йилнинг 5 декабридан бошлаб Россия нефтининг бир баррели учун 60 доллар даражасидаги нарх чегараси аллақачон ишлай бошлаган.

Аввалроқ Россия расмийлари нефть ва нефть маҳсулотлари чекловлар жорий этган мамлакатларга етказиб берилмаслигини айтган эди.