Қозоғистон Ўзбекистон билан чегарада электрон навбат жорий этади. У қандай вазифани бажаради?

Қозоғистон февраль ойи охиригача Ўзбекистон ва Туркманистон билан чегарасида электрон навбат жорий этади. Бу ҳақда “Капитал.кз” хабар берди. 

Қозоғистон Давлат даромадлари қўмитаси яна тўртта назорат-ўтказиш пунктида электрон навбат жорий этилишини маълум қилди. Электрон навбат тизими қозоғистонлик ишлаб чиқувчилар ва Қозоғистон Молия вазирлигининг “Ахборот ва бухгалтерия маркази” АЖнинг CarGoRuqsat онлайн бронлаш хизмати мутахассислари томонидан яратилган ва юритилади.

“Тўртта назорат-ўтказиш пунктидан иккитаси Хитой билан чегарада жойлашган. У Бахтида 15 февралдан ва Майкапчагай пунктида 20 февралдан ишга тушади. Аввалроқ Қозоғистон-Хитой чегарасида Дўстлик ва Нур-Жоли назорат-ўтказиш пунктларида электрон навбат жорий қилинганди. 

Қолган иккита назорат пункти мамлакат жануби-ғарбий қисмида жойлашган, хусусан Темир-Баба назорат пункти 22 февралдан ва Тажен 27 февралдан ишга тушади. Иккала назорат-ўтказиш пункти ҳам Мангистов вилоятида жойлашган. Биринчиси Туркманистон билан чегарада, иккинчиси Ўзбекистон билан ўрнатилади”, — дея тушунтирди Давлат даромадлари қўмитаси.

Бугунги кунда тизимдан 7,5 мингга яқин фойдаланувчи рўйхатдан ўтган бўлиб, улар 84 минг навбатни брон қилиш амалиётини олиб борган. Электрон навбат хизматига Face ID, яъни юзни сканерлаш тизими қо;шилиши кутилмоқда. Шунингдек, чет эл фуқаролари учун банк картаси орқали шахсни тасдиқлаш имкониятини ишга тушириш режалаштирилган.

Электрон навбатнинг вазифаси нимадан иборат?

CarGoRuqsat электрон навбат хизматининг вазифаси ташувчиларга навбатни олдиндан брон қилиш имкониятини беради. Биринчидан, бу чегарадан юк машиналари ўтиши жараёнини тезлаштиради. Сабаби брон қилиш босқичида юк ташувчилар формат-мантиқий назоратдан ўтади. Тизим аризачининг солиқдан қарзи борлиги, пуллик йўлларни текширади. Хизматнинг иккинчи вазифаси чегарадаги навбатни ноқонуний манипуляция қилиш хавфини камайтиришдан иборат.