2023 йилнинг январь ойида Афғонистонда юзлаб болалар аномал совуқ ва турли касалликлар туфайли вафот этди. Бундай маълумотлар Бирлашган Миллатлар Ташкилотининг Болалар жамғармаси (UNICEF) Twitter саҳифасида тақдим этилган.
“Афғонистондаги қаҳратон қиш аҳолининг энг ҳимоясиз қатламларига зарар етказишда давом этмоқда. Январь ойида совуқ ҳаво ва касалликлар туфайли юзлаб болалар вафот этди. UNICEF гўдаклари учун мотам тутаётганларга самимий ҳамдардлик билдиради, уларнинг руҳи ором олсин”, — дейилади жамғарманинг Афғонистондаги ваколатхонаси баёнотида.
Афғонистон муваққат ҳукуматининг Табиий офатларни бошқариш бўйича вазирлиги матбуот котиби мулла Абдулла Муҳаммадий ҳам совуқ, сув тошқини ва ёнғинлар оқибатида ҳалок бўлган аҳоли сони ҳақидаги маълумотларни келтирди.
“Ҳозирги кунга қадар мамлакатнинг 24 вилоятида 180 дан ортиқ одам ҳалок бўлди, 30 дан ортиқ киши жароҳатланди, 150 дан ортиқ уй тўлиқ ёки қисман вайрон бўлди, 83 минг бош чорва моллари нобуд бўлди”, — дейди Муҳаммадий.
Афғонистонлик ижтимоий эксперт Аҳмад Файиқнинг айтишича, совуқ мавсумда ўлим ҳолатларининг олдини олиш учун мамлакат ҳукумати заиф ҳудудларни ёқилғи, бепул дори-дармон ва тиббий ёрдам билан таъминлаши керак.
Аввалроқ халқаро ёрдам ташкилотлари, жумладан, UNICEF 2022 йил охирида “Толибон”нинг Афғонистонда турли гуманитар лойиҳаларни амалга оширувчи хорижий ноҳукумат ташкилотларида аёлларнинг ишлашини тақиқлаш ҳақидаги қарорини танқид қилиб, уни бекор қилишга чақирганди. Нодавлат нотижорат ташкилотларида аёлларнинг ишлашини чеклаш аксарият ташкилотларнинг Афғонистондаги лойиҳаларини қисқартиришига олиб келган, чунки улар ўз фаолиятини аёл ходимларсиз давом эттира олмаган.
Изоҳ (0)