“Дарё” нашри 15 февралда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Туркия ва Сурияда қурбонлар сони 40 мингдан ошди. Зилзиладан сўнг 5 млн дан ортиқ одам бошпанасиз қолиши айтилмоқда
Туркия ва Сурияда содир бўлган зилзилалар оқибатида ҳалок бўлганлар сони 40 мингдан ошди. Бу ҳақда Al Jazeera хабар берди.
Туркия ҳукумати ҳозиргача, вайроналар остидан 35 418 кишининг жасади топилганини, Сурия расмийлари эса 5 800 дан ортиқ одам ўлганини маълум қилган. мазкур ҳолатда Туркия президенти Ражаб Тоййиб Эрдўғон мамлакатда вайроналар остидан 8 мингдан ортиқ одам тирик олиб чиқилганини таъкидлаган.
Айни вазиятда Халқаро миграция ташкилотининг гуманитар ёрдам юкланган ўнта юк машинаси Баб эл-Салом назорат-ўтказиш пункти орқали Сурияга жўнатилган. Туркиядаги зилзиладан 200 соат ўтгач қутқарувчилар вайроналар остидан тирик одамларни ҳам аниқламоқда.
БМТ ҳисоб-китобларига кўра, зилзилалардан сўнг Сурияда 5,3 миллионга яқин одам бошпанасиз қолиши мумкин. Айни пайтда Туркия ва Сурияда 900 мингга яқин одам зудлик билан иссиқ овқатга муҳтож.
Россия самолётлари Украина чегараларига яқинлашади, Украина ҳаво ҳужумидан мудофаани тўлиқ сақлай оладими?
Россия ҳарбий самолётлар ва вертолётларни Украина чегараларига яқинроқ жойга кўчирмоқда, бу эса урушнинг янги босқичга ўтишидан далолат бериши мумкин. Бу ҳақда Financial Times газетаси НАТО мамлакатларининг разведка маълумотларига эга бўлган икки расмийсига таяниб хабар берди.
Нашр суҳбатдошларидан бирининг сўзларига кўра, Россиянинг қуруқликдаги қўшинлари камайган, шунинг учун Кремл янги ҳужумнинг бир қисми сифатида қолган самолётларига таяниши мумкин. НАТО ҳисоблашича, Россия ҳарбий авиациясининг қарийб 80 фоизидан фойдаланган ҳолда ҳаво кампаниясини бошлашга тайёрланяпти ва Украинанинг ҳаво ҳужумидан мудофаа тизимини ишдан чиқаришга уринмоқда.
Financial Times манбаларининг айтишича, шу сабабли Украина ҳаво мудофаасини кучайтириш масаласи Ғарб иттифоқчиларининг сўнгги учрашувида устувор масала бўлган, Украинага қирувчи самолётлар етказиб бериш масаласи эса иккинчи ўринга қўйилган.
Уруш учун тўпланаётган одамлар...
Пентагон раҳбари Ллойд Остин 14 февраль куни Брюсселда бўлиб ўтган НАТО йиғилишидан сўнг журналистларга Россия авиациясининг Украина чегаралари яқинида тўпланиши белгиларини ҳали кўрмаганини айтди.
“Аммо биламизки, Россия захирасида ҳали ҳам катта миқдордаги авиация бор. Шунинг учун Украинани имкон қадар кўпроқ ҳаво ҳужумидан мудофаа билан таъминлаш учун ҳамма нарсани қилиш кераклигини таъкидламоқдамиз”, — дея унинг сўзларини келтиради BBC.
Украина ва Ғарб разведкаси Россия Украинага янги ҳужумни режалаштираётгани ҳақида бир неча бор огоҳлантирган, ҳужум босқиннинг бир йиллигига тўғри келиши мумкин.
The Washington Post газетасининг Ғарб давлатлари ва Украина разведка хизмати ҳисоб-китобларига таяниб хабар беришича, ҳозирда Россия Украинада 300 мингга яқин одам тўплаган, бу уруш бошидаги одамлари сонидан икки баравар кўп. Ғарб давлатлари Россия урушга яна бир неча юз минг кишини жалб қилишини кутмоқда.
Мактабгача ва мактаб таълими вазирлиги ҳудудий бўлинмалари ҳокимликларга ўтказиладими?
Мактабгача ва мактаб таълими вазирлиги ҳудудий бўлинмалари ҳокимликларга ўтказилиши келтирилган президент фармони лойиҳасига эътироз билдирди. Таъкидланишича, ушбу норматив-ҳужжат ҳозирда лойиҳа бўлиб, расмий кучга эга эмас. Бу ҳақда вазирлик ахборот хизматида маълум қилинди
Хабарга кўра, президентининг “Республика ижро этувчи ҳокимият органлари ва маҳаллий ҳокимликлар масъулиятини ошириш бўйича қўшимча чора-тадбирлари тўғрисида”ги фармони лойиҳасида Мактабгача ва мактаб таълими вазирлигининг ҳудудий бўлинмаларини маҳаллий ҳокимликлар тузилмасига ўтказиш қайд этилган ва ушбу ҳужжат лойиҳасини тегишли вазирлик ва давлат идоралар билан келишиш учун Адлия вазирлиги томонидан “project.gov.uz”га жойлаштирилган.
Таъкидланишича, ушбу норматив-ҳужжат ҳозирда лойиҳа бўлиб, расмий кучга эга эмас. Айни дамда Мактабгача ва мактаб таълими вазирлиги томонидан фармон лойиҳасидаги тегишли бандлар бўйича эътироз билдирилиб, Адлия вазирлиги билан музокаралар ўтказилган.
Вазирлик хабарида ушбу масала бўйича соҳа ходимлари ва кенг жамоатчилик вакилларининг хавотирига ўрин йўқлиги айтилган.
Изоҳ (0)