Ўзбекистоннинг уч ҳудудида электр ва газдан ноқонуний фойдаланганлар 550 млн сўмдан зиёд зарар етказди 

Ўзбекистонда Электр энергияси ва табиий газ тармоқларига яширинча уланиш оқибатида давлатга 550 миллион сўмдан зиёд зарар етказди.

Хабарга кўра, департаментнинг Бўстонлиқ туман бўлими томонидан ўтказилган терговга қадар текширувда, “С.С.” МЧЖ раҳбари З.З. корхонанинг тикувчилик цехини бошқа хусусий корхонага тегишли трансформаторга улаб, 417 минг кВт/с электр энергиясидан ноқонуний фойдаланганлиги аниқланган.

Шу каби, Департаментнинг Асака туман бўлими томонидан ўтказилган терговга қадар текширувда, “Э.Б.” хусусий корхонаси раҳбари корхонанинг оҳак ишлаб чиқариш цехини ўзбошимчалик билан умумий фойдаланишдаги газ тармоғига улаб олиб, 130,7 минг куб табиий газдан ноқонуний фойдаланганлиги аниқланган.

Шунингдек, департаментнинг Шайхонтоҳур туман бўлими томонидан ўтказилган терговга қадар текширувда, фуқаро Д.А. яшаш хонадонида ташкил этган сомсахонани газ тармоғига ўзбошимчалик билан улаб олиб, 162,4 минг куб табиий газдан ноқонуний фойдаланганлиги аниқланган.

Департаментнинг Қибрай туман бўлими томонидан “Қибрайтумангаз” ГТФ ходимлари билан ҳамкорликда ўтказилган тезкор тадбирда, фуқаро О.Э., “Ўнқўрғон” МФЙда иссиқхона ташкил қилиб, аҳоли учун мўлжалланган асосий газ қувурига уланиб олиб, 5,3 минг куб  табиий газдан ноқонуний фойдаланганлиги аниқланган.

Департаментнинг Нуробод туман бўлими томонидан ўтказилган терговга қадар текширувда эса, “Х.” фермер хўжалиги раҳбари Э.Х., туман электр тармоқлари корхонаси устаси Н.Б. ёрдамида фермер хўжалиги ер майдонига ҳужжатсиз трансформатор ўрнатиб, 127,9 минг кВт/с электр энергиясидан ноқонуний фойдаланганлиги аниқланган.

Қайд этилишича, ушбу қонунбузилиш ҳолатлари оқибатида, давлат ва жамият манфаатларига жами 553,6 млн сўм зарар етказилган. Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.