Япониянинг ўзини-ўзи мудофаа қилиш кучлари жангчилари зилзиладан жабр кўрган Туркияга ёрдам бериш учун 13 февраль куни ҳукумат самолётида учиб кетди, деб хабар бермоқда TBS.
Қайд этилишича, Туркияга жами 120 га яқин ҳарбий хизматчи юборилиши кутилмоқда. 13 февраль куни, одатда Япония бош вазири томонидан фойдаланиладиган Boeing 777 самолёти ҳарбийларнинг бир қисмини қўшимча гуманитар ёрдам ва ерда қидирув-қутқарув ишларини олиб бориш учун зарур бўлган материаллар билан бирга Туркияга олиб кетди. Туркияда Япония Мудофаа вазирлиги табиий офат оқибатларини бартараф этиш учун зарур бўлган маълумотларни йиғиш ва таҳлил қилиш пунктини аллақачон ташкил этган.
Япония ўзини-ўзи мудофаа кучлари тегишли тажрибага эга – ўз ватанида япон ҳарбий хизматчилари зилзилалар, кўчкилар, тайфунлар ва тошқинлардан кейин мунтазам равишда қутқарув ишларини олиб боради.
Аввалроқ Япония Туркия жануби-шарқига 70 га яқин қутқарувчи, шунингдек, инсонпарварлик ёрдами ортилган бир неча самолёт жўнатган эди. Япония ҳукумати томонидан Сурияга ҳам инсонпарварлик ёрдами юборилган.
6 февраль куни Туркияда 7,7 ва 7,8 магнитудали кучли зилзилалар содир бўлди. 11 февраль оқшомида сейсмологлар 2100 дан ортиқ ерости силкинишини қайд этган. Вайронкор зилзила қўшни мамлакатларда, жумладан, Сурия, Ливан, Шимолий Кипр Турк республикаси, Греция Кипри ва Ироқда ҳам сезилди.
Туркиядаги зилзиладан сўнг 90 дан ортиқ давлат ўз ёрдамини таклиф қилди. Улар қаторида Ўзбекистон ҳам Туркияга 100 кишидан иборат қидирув-қутқарув отрядини жўнатди.
Изоҳ (0)