Ту-160 стратегик бомбардимончи самолётларини ишлаб чиқарувчи Қозон авиация заводининг муҳандиси АҚШга қочиб кетди. Бу ҳақда Insider хабар берди.
АҚШ божхона ва чегара қўриқлаш хизмати ҳисоботида тегишли маълумот келтирилган. Муҳандис бомбардимончи самолёт ҳақида маълумот бериш эвазига АҚШдан бошпана сўрамоқда. Россиянинг Ту-160 стратегик бомбардимончи самолётида ишловчи муҳандислардан бири декабрь ойи охирида оиласи билан зирҳли жипда Мексика орқали АҚШга қочиб ўтган.
Эркак мухолифатчи Алексей Навалнийни қўллаб-қувватлаган намойишларда қатнашгани учун Россия расмийлари томонидан таъқиб қилинишидан қўрқишини билдирди. У бошпана бергани учун Россия ҳарбий авиацияси ҳақида муҳим маълумотларни очиқлашга тайёрлигини айтди. Эркак муҳандис-қурилиш мутахассиси бўлгани ва 2018 йилдан 2021 йилгача Қозон шаҳридаги Туполев авиация заводида маълум турдаги ҳарбий самолётлар ишлаб чиқаришда ишлаганини таъкидлади.
Америка разведка идоралари россияликни узоқ вақтдан текшириб, у ҳақиқатан ҳам муҳим маълумотларга эга деган хулосага келди.
“Сўнгги бир неча йил ичида Туполев заводи самолётнинг такомиллаштирилган версиясини яратиш бўйича янги йирик дастурни, шунингдек, мавжуд самолётларни модернизация қилиш дастурини бошлади”, — дейилади хабарда.
Америка расмийлари бу воқеани журналистларга тасдиқлаш ёки рад этишдан бош тортди. Ҳозирда Федерал қидирув бюроси эркакни сўроқ қилмоқда. Шу билан бирга, ҳарбий эксперт Майкл Кофман муҳандис қандай маълумотларга эга бўлиши мумкинлигини тушунтирди.
"Туполев каби ҳарбий саноат корхонасида ишлайдиган шахс Ту-160 бомбардимончи самолётининг техник хусусиятлари ва унинг янги ишлаб чиқилган версияси, турли ишлаб чиқариш жараёнлари ҳақида бир қатор маълумотларга эга бўлиши мумкин”, — деди Кофман.
Ту-160 қандай самолёт?
Ту-160 Туполев конструкторлик бюроси томонидан 1970 йилларда ишлаб чиқилган қитъалараро стратегик бомбардимончи. У Россиянинг мавжуд бўлган энг яхши стратегик бомбардимончиси ҳисобланади. 2015 йилда Россия Ту-160М самолётининг янгиланган версиясини ишлаб чиқаришга қарор қилди. Очиқ манбалардан маълумки, 2022 йил охирига келиб шундай самолётлардан бири нолдан қурилган, иккинчиси эса эски техникани чуқур модернизация қилиш натижасида яратилган.
Украинага қарши урушда Россия Украина фуқаролик инфратузилмасига ракета зарбалари бериш учун Ту-160 бомбардимончи самолётларидан фойдаланмоқда. 2022 йил декабрь ойида Ту-160 самолётлари жойлашган аэродромларда портлашлар содир бўлганди. Шундан сўнг Россия бомбардимончи самолётларни бошқа жойга кўчирган.
Изоҳ (0)