Россиянинг бир неча қирувчи ва стратегик бомбардимончи самолётлари Аляска яқинидаги халқаро ҳаво ҳудудини кесиб ўтгани сабабли АҚШ жанговар самолётлари ҳавога кўтарди. Бу ҳақда Sky News хабар берди.
Хабарда айтилишича, Шимолий Америка Аэрокосмик Мудофаа Қўмондонлиги (NORAD) ҳаво ҳудудига иккита F-16 қирувчи самолётини юборган. NORAD баёнотида Россия самолёти АҚШ ҳаво ҳудудига кирмагани ва ҳеч қандай хавф туғдирмагани келтирилган.
“Россия самолёти халқаро ҳаво ҳудудида қолди ва АҚШ ёки Канада ҳаво ҳудудига кирмади”, — дейилади баёнотда.
NORAD гап Россиянинг Ту-95МС самолёти ва уларга ҳамроҳ бўлган қирувчилар ҳақида кетаётганини таъкидлади.
Ўз навбатида, Россия уларнинг авиатехникалари халқаро сувларда, хусусан, Аляска ва Россия ўртасидаги Беринг денгизида режалаштирилган парвозларни амалга оширганини маълум қилди. Россия самолётлари бу ҳудудда аввал ҳам парвоз қилган, бироқ Россиянинг Украинага қарши урушидан кейин Ғарб давлатлари ўз чегаралари яқинида Россиянинг ҳар қандай ҳарбий фаолиятидан хавотирда. АҚШ армияси Хитой шари уриб туширилгандан кейин ҳаво кучларини шай ҳолатга келтирган.
14 февраль куни Нидерландиянинг иккита F-35 қирувчиси учта Россия ҳарбий самолётидан иборат гуруҳни Польша осмонида тутиб, уларни НАТО масъулияти ҳудудидан ташқарига олиб чиққан.
2022 йил октябр ойида АҚШ Ҳарбий-ҳаво кучларининг F-16 қирувчи самолётлари АҚШнинг Аляска штати яқинида Россиянинг иккита Ту-95 стратегик бомбардимончи самолётини пайқаб, тўхтатиб қолган.
Изоҳ (0)