Буюк Британия мудофаа таҳлил маркази Украинадаги уруш 2023 йилда тугамаслиги ва камида кейинги йил давом этишини прогноз қилди. Бу ҳақда BBC хабар берди.
Қироллик бирлашган хизматлар институти директори ўринбосари Малколм Чалмерснинг айтишича, Ғарб яқин ойларда Украинанинг қарши ҳужумини қўллаб-қувватлаши керак. Бу Украина ҳарбийларининг узоқ давом этадиган урушга тайёргарлик кўриши учун зарурдир.
“Чунки 2023 йил урушнинг тугаш эҳтимоли жуда паст”, — деди Чалмерс.
Унинг фикрича, бугун на Россия, на Украина жанг майдонида устунликка эга. Британия хизмати вакили Россия самолётларини Украина билан чегараларига жойлаштираётгани ҳақида ҳам изоҳ берди. Бу ташвишли воқеалиги, аммо "фавқулодда вазият эмас"лигини таъкидлаган.
Қироллик институти раҳбари ўринбосари Россия фронтда жуда кўп одамлари ва кўплаб техникаларини йўқотаётганини қайд этди. Ҳозирги масала рус қўшинлари ҳужумни қанчалик кўтара олишида эканини айтди.
"Бу урушнинг дастлабки босқичи каби Украина ҳудудларини босиб олишга ўхшамайди. Чунки украиналиклар ҳозир сафарбар ва ўз ҳуқуқлари, ҳудудлари учун жуда қаттиқ курашмоқда”, — деди Малколм Чалмерс.
Эслатиб ўтамиз, 7 февраль куни Чеченистон раҳбари Рамзан Қодиров Россия-Украина уруши 2023 йилда Россиянинг ғалабаси билан якунланишини айтганди. Унга кўра, “Ғарб тиз чўкади” ва у Москва билан ҳамкорлик қилишга мажбур бўлади.
1 февраль куни Украина разведка раҳбари Кирилл Буданов Украина 2023 йил ёзгача Қримни озод қилиши ва шу тариқа Россия билан урушни тугатиши кераклигини айтганди. Унга кўра, баҳорда Россия яна кенг кўламли ҳужумга ўтишга уриниб кўради.
Изоҳ (0)