Ўзбекистон Афғонистонга ваъда қилинган миқдорда электр энергияси етказиб беришни бошлади

Афғонистон миллий электр компанияси (Dа Afghanistan Breshna Sherkat – DABS) Ўзбекистондан импорт қилинадиган электр энергияси нормал ҳолатга қайтганини маълум қилди. Бу ҳақда Тоlо News хабар берди.

DABS расмийларига кўра, Кобул аҳолиси энди суткасига тўққиз соат электр энергиясига эга.

“Бизда ҳозир ҳеч қандай муаммо йўқ. Ўзбекистондан етказилаётган 400 мегаватт электр энергияси ва маҳаллий электр энергияси ёрдамида заводларни таъминламоқдамиз. Шунингдек, Кобул фуқароларини кундузи беш соат, кечаси эса тўрт-беш соат электр билан таъминладик”, — дейди DABS директори Ҳикматулла Охундзода.

Бироқ Афғонистон Саноат ва конлар палатасининг маълумотларига кўра, саноат паркларида ҳар куни бор-йўғи тўққиз соат электр қуввати мавжуд, бу эса маҳаллий маҳсулотларни ишлаб чиқариш учун етарли эмас.

“Сўнгги бир ойда мамлакат саноати, хусусан, Кобулда электр қуввати йўқлиги сабабли заводларимизнинг қарийб 90 фоизи тўхтаб қолган бўлса, ҳозирда уларнинг 50 фоизи ишига тушди”, — дейди Афғонистон саноат ва конлар палатаси депутат Сахи Аҳмад Пайман.

“Саноат жараёни учун саккиздан тўққиз соатгача қувват етарли эмас. Ишлаб чиқариш жараёни учун камида 18-20 соат қувват талаб қилинади. Фавқулодда вазиятда эса атиги 14-15 соат керак бўлади", — дейди Кобул саноат ва конлар палатаси ижрочи директори Муҳаммад Карим.

Айни пайтда баъзи завод эгалари Афғонистон муваққат ҳукуматидан заводларни кўпроқ электр энергияси билан таъминлашни сўрамоқда. 

“Етарли электр энергияси етишмаслиги саноатчилар ва мамлакат аҳолисининг иқтисодий ўсишини заифлаштиради”, — деди завод эгаси Моҳаммад Тожик.

DABS маълумотларига кўра, Кобул саноат парклари 160 мегаватт электр энергиясига муҳтож ва DABS ҳозирда Кобул заводларини 70 дан 100 мегаваттгача электр энергияси билан таъминлай олган.

22 январь куни “Толибон” Афғонистондаги электр энергияси тақчиллиги сабабли Ўзбекистонга мурожаат қилиб, электр энергияси бўйича шартномага мувофиқ ўз ваъдаларини бажаришга чақирганди.

23 январь куни Ўзбекистон Энергетика вазирлиги Афғонистонга электр энергиясини етказиб бериш қайта тикланиши режалаштирилаётганини эълон қилди.

27 январь куни “Толибон” Ўзбекистонни яна электр энергияси бўйича ваъдани бажармаганликда айблаганди.