“Ўзбекистон зилзилалар доимий содир бўлиб турадиган зонада жойлашган” – профессор Воҳидхон Исмоилов

Фанлар академияси Сейсмология институти директори ўринбосари Воҳидхон Исмоилов “Дарё” нашрига берган интервьюсидан Ўзбекистон сейсмофаол ҳудудда жойлашганини айтди.

Профессорнинг таъкидлашича, мамлакатдаги Тяншан ва Помир тоғлари ер силкинишлари сабабли пайдо бўлган.  

“Global сейсмоген зоналар Ер қаърининг Ўрта Ер денгизи параллелида жойлашган. Иккинчи сейсмоген зона эса Тинч океани ҳудуди ҳисобланади. Япония, Флиппин, Курилла, Индонезия — буларнинг бари сейсмоген зонададир.

Ўзбекистон ҳам Ўрта Ер денгизи сейсмоген зонасида жойлашган. Хоҳлаймизми, йўқми, бу ерларда зилзилалар бўлади. Чунки тектоник плиталар ҳаракати ўзаро боғлиқ. Масалан, Ўзбекистондаги тоғларнинг пайдо бўлишига асосий сабаб ҳам тектоник плиталарнинг бир-бирига нисбатан ҳаракати ҳисобланади. Тяншан, Помир тоғлари нима учун пайдо бўлди? Бу Турон плитаси билан Ҳиндистон плитасининг бир-бирига жуда катта босими натижасидир. Ҳиндистон плитаси Турон плитасининг остига кириб кетаётиб, Турон плитасини кўтаргани сабабли Помир ва Тяншан тоғлари пайдо бўлган.

Бу ўзидан ўзи бўладиган жараён эмас. Мазкур ҳодисалар миллионлаб йиллар давомида юз беради. Шунинг учун у ерларда жуда катта зилзилалар, тектоник ёриқлар пайдо бўлиши кузатилган ва кузатилмоқда. Шу жараёнлар ҳалигача давом этяпти, тўхтагани йўқ ва ҳали-бери тўхтамайди”, – деди мутахассис.

Воҳидхон Исмоиловнинг айтишича, Ўзбекистондаги энг сейсмофаол ҳудудлар мамлакатнинг шарқий қисми – Фарғона, Андижон, Наманган вилоятларидир.

“Бу ҳудудлар тектоник плиталарнинг энг фаол қисмида жойлашган. Фарғона водийсида “Таласа Ферган” деган катта регионал ёриқ кетган. Унинг узунлиги 500—700 километрдан иборат.

Мамлакатда тарихан турли даражалардаги кўплаб зилзилалар бўлиб келган. Масалан, 1907 йилда Тожикистон ва Ўзбекистон орасидаги сейсмоген зонада Қоратоғ зилзиласи бўлган. Ундан кейин, 1946 йилда магнитудаси бўйича Туркияда юз берган зилзила кучига яқин Чотқол зилзиласи кузатилган.

1976 йилда Газлида (Бухоро-таҳр.) иккита кетма-кет зилзила юз берди. Уларнинг ҳам магнитудаси 7 баллдан ортиқ эди. Орадан 8 йил ўтиб, Газлида яна бир, магнитудаси 7,4 бўлган зилзила кузатилган. Мазкур ер силкинишлари жуда талафотли ва кучли бўлган. Умуман олганда, Ўзбекистонда дам-бадам шунақа кучли зилзилалар содир бўлиб туради.

Яна бир мисол, XIV асрда Ахсикентда ер қимирлаган. Наманганда жойлашган ўша пайтдаги шоҳ саройларининг барчаси зилзиладан вайрон бўлган, дейишади.

Тарихий манбаларда зилзилаларга оид кўплаб маълумотлар бор. Жумладан, 942 йилда Кўҳна Урганч зилзиласи келтирилган.

1966 йилда Тошкент зилзиласи, ундан 100 йил муқаддам, 1868 йилда Тошкентнинг шарқий қисмида шунақа кучдаги, 6 магнитудали зилзила содир бўлган. Ўзбекистон зилзилалар доимий содир бўлиб турадиган ҳудуд ҳисобланади”, – деди сейсмолог.

Аввалроқ Воҳидхон Исмоилов Туркияда кучли зилзила бўлиши аввалдан кутилганини айтганди.