Қуддусда машина автобус бекатига кириб кетиши оқибатида икки киши ҳалок бўлди. Бу ҳақда The Jerusalem Post хабар берди.
Маълум қилинишича, Исавийя маҳалласида яшовчи 31 ёшли эркак машинасини Рамот кварталига кираверишдаги автобус бекатига уриб юборган. Оқибатда олти ёшли бола ва 20 ёшли йигит ҳалок бўлган, 5 киши тан жароҳати олган.
Исроил бош вазири Бинямин Нетаняху воқеани теракт деб баҳолаган, машина ҳайдовчисининг уйини муҳрлаб, бузиб ташлашни буюрган. У ҳалок бўлганларнинг оила аъзоларига ҳамдардлик билдирган.
“Мен хавфсизлик кучларини кучайтириш, ҳибсга олиш ва террорчининг уйини муҳрлаш ва бузиш учун зудлик билан чоралар кўриш бўйича кўрсатма бердим. Терроризмга жавобимиз бор кучимиз билан зарба бериш ва мамлакат устидан назоратни кучайтиришдир”, — деган Нетаняху.
Хамас матбуот котиби Ҳазем Қоссим Рамотдаги ҳужумга муносабат билдирган.
“Қаҳрамонлик операсияси Фаластин халқига қарши ишғолнинг барча жиноятларига табиий жавоб ҳисобланади”, — дейилади баёнотда.
Изоҳ (0)