Украина Ф-16 қирувчиларини олиш бўйича Нидерландияга расмий сўров билан чиқди. Буни Нидерландия мудофаа вазири Кайса Олленгрен тасдиқлади.
![](/static/Dunyo/2803347.jpg)
Олленгреннинг сўзларига кўра, бу талабни бажариш осон эмас. Самолёт АҚШнинг мудофаа тизими бўлиб, шунинг учун аввал АҚШ ҳукуматидан рухсат олиш керак.
“Биз Ф-16 берилишини америкаликлар ва бошқа иттифоқчилар билан муҳокама қилишимиз керак. Ва бунинг оқибатларини ҳам жиддий кўриб чиқишимиз керак, бу бир кечада амалга ошадиган иш эмас. Бу борада ҳалол бўлишимиз керак”, — деди вазир.
Шунингдек, Украина армияси қирувчилардан фойдаланишидан олдин аскарлар тегишли тайёргарликдан ўтиши кераклиги қайд этилган.
Нидерландия мудофаа вазири узоқ истиқболда Украина Ф-16 лардан фойдаланиладиган давлатлардан бирига айланишини инкор қилмади.
“Нима бўлганда ҳам мамлакат энди ҳеч қачон аввалгидек рус қирувчиларини сотиб ололмайди”, — деди у.
Бунга қадар Нидерландия бош вазири Марк Рютте Украинанинг Ф-16 қирувчиларини олиш бўйича сўровини кўриб чиқишга тайёрлигини, бироқ ҳозирча бундай сўров келиб тушмаганини айтган эди.
Аввалроқ The New York Times газетаси АҚШ учинчи давлатларга Американинг Ф-16 қирувчи самолётларини Украинага топширишга рухсат бериши мумкинлиги ҳақида ёзганди. Катта эҳтимол билан Украина Дания ёки Нидерландиядан Ф-16 қирувчиларини олади, дейди The New York Times газетасининг Европа ва Америка расмийлари орасидан аноним суҳбатдошлари. Уларнинг айтишича, хусусан, Нидерландия ихтиёрида 40 га яқин Ф-16 самолётлари мавжуд.
“Бу ҳақда гапираётган бошқа давлатлар ҳам бор. Улар таклиф билан чиқсагина, биз музокаралар олиб борамиз, деб ўйлайман”, — деди АҚШ Мудофаа вазирлигидаги Politico манбаси. Унинг таъкидлашича, Пентагон самолётлар етказиб берилишига эътироз билдирмайди, аксинча “буни устувор қўйишда давом этади”.