Бадминтон бўйича Ҳиндистон чемпиони, Айшвария Рай билан солиштириладиган Болливуд юлдузи Дипика Падуконенинг ҳаёт ва ижод йўли ҳақида (фото)

Дипика Падуконе бадминтон спорт тури бўйича дунё бўйлаб машҳурликка эришиши мумкин эди. Бироқ у 16 ёшида модел бўлиш истагида тўсатдан спортни тарк этди. Бугунги кунда Дипика Болливуднинг энг муваффақиятли ва изланувчан актрисаларидан бири ҳисобланади. У ҳинд кино оламида ўз ўрнини эгаллашдан олдин кўплаб қийинчиликларни енгиб ўтди.  

Дипика Падуконе 1986 йилнинг 5 январида Дания пойтахти Копенгагенда туғилган, унинг отаси бадминтон юлдузи Пракаш Падуконе 1991 йилгача ушбу спорт тури билан шуғулланган. Дип оиласининг барча аъзолари спорт билан шуғулланар эди.  

Актрисанинг бобоси “Майсур бадминтон ассоциацияси”да ишлаган. Дипиканинг отаси ҳам бутун ёшлигини ушбу спорт турига бағишлади ва бадминтон бўйича дунёдаги энг яхши ўйинчига айланди.

Пракаш 19 ёшида у биринчи халқаро унвонни қўлга киритди. У 1980 йилда дунёда биринчи ўринни эгаллади ва 36 ёшида 3 та халқаро олтин медал билан нафақага чиқди. Кейинчалик у ўзи туғилиб ўсган Бангалор шаҳрида ёш ўйинчиларни тайёрлаш академиясини ташкил этди ва уч йил давомида Ҳиндистон терма жамоасига устозлик қилди.

Дипика болалигида бадминтон бўйича Ҳиндистон чемпиони бўлган ва баскетболни профессионал даражада ўйнаган. Унинг синглиси Аниша ҳам халқаро голф чемпиони, шунингдек, крикет ва баскетбол бўйича профессионал бўлган. 

Дипиканинг 6 ёшгача бўлган даври Бангалор ва Данияга саёҳат қилиш билан ўтди. 1991 йилда актрисанинг оиласи Ҳиндистонга қайтиб келди ва кейин Дип учун спортчининг ҳақиқий ҳаёти бошланди. У эрталаб соат 5 да туриб, машқ қилиб, мактабга борарди. Кейин яна машғулотлар билан шуғулланиб, уй вазифасини тайёрлаб, ухлар эди.

Дипика интервьюларининг бирида болалигида уятчан қиз бўлганини айтган, аммо унинг жадвалига қараб, у уятчанми ёки йўқлигини билиб бўлмайди. У машғулотлар ва ўқишдан ташқари, ҳеч нарса билан шуғулланмаган.

16 ёшида чемпион бўлган Дипика жасоратини тўплаб, отасига бадминтонни ташламоқчи эканини айтган. Дипика эса отаси унинг бу қароридан умуман ранжимаганини кўриб ҳайрон қолади. Дипика коллежга қабул қилинди, бироқ ўқимади, чунки унга модел сифатида ишлашни таклиф қилишди.

Актриса 21 ёшида киноларда суратга тушиш учун холаси билан Бомбейга кўчиб ўтди. Дипика меҳнатсевар эди ва у ўз карьерасига жиддий эътибор қаратди. Ўзини соатлаб машғулотларга бағишлаган актриса ҳаётга енгил қарай олмади.

У нафақат ташқи кўриниши, балки меҳнатсеварлиги туфайли ҳам тезда машҳурликка эришди. Дипика кино саноатда биринчи марта пайдо бўлганида, уни мамлакатдаги энг машҳур модел Айшвария Рай билан солиштиришди. Дипика босма рекламалар, телекўрсатувлар ва мусиқий видеоларда роль ўйнади.

Дипика шартнома имзоланган биринчи фильм “Янги йилингиз билан” кинокартинаси эди. Аслида, режиссёр Фараҳ Хон Малайка Арорага бу ролни бермоқчи эди, лекин Малайка бу лойиҳага қизиқмади ва унинг ўрнига Дипиканинг агенти бўлган дўстининг рақамини берди. Ушбу лойиҳа суратга олинмади ва Дипика унинг ўрнига “Айшвария” деб номланган фильмда дебют қилди.

Бироқ Фараҳ Дипга “Ом Шанти Ом” мелодрамасидан бош ролни таклиф қилди. Шундан кейин Дипика кино юлдузига айланди. У яхши актриса эди, аммо унинг биринчи роллари актрисанинг истеъдодини умуман очиб бермади.

Падуконе лойиҳаларда шунчаки қаҳрамон севиб қолган гўзал қиз ролини ўйнаши керак эди. Унинг салоҳиятини тушунишга ёрдам берадиган нарса йўқ эди.

Булар эса унинг ўзига хос жиҳатларини очиб бермаган ёки актрисани бошқалардан ажратиб турмаган. Дипика актриса сифатида ўзини кўрсатиши керак эди. У “Коктейл” фильмида суратга тушганидан кейин ўзи учун керакли нарсани топди.

Ушбу фильмда у ҳақиқатан ҳам нимага қодирлигини кўрсатди. Бу ажойиб ижро ва мураккаб характер эди. Актрисанинг образи назарий жиҳатдан томошабинга ёқмаслиги керак бўлган катта юракли қиз эди, бироқ Дипика ўзининг бетакрор табассуми билан бу ишнинг уддасидан чиқди.

Дипика иккинчи ҳинд фильми устида ишлаётган пайтда партнёри Ранбир Капурни севиб қолган. Ўша пайтда актёр 26 ёшда, Дипика эса 21 ёшда эди. Улар кўп марта бирга интервью беришди, Дипика унинг ота-онаси билан суратга тушди ва бошининг орқа томонига “РК” ҳарфларини татуировка қилди. Актриса кейинчалик Ранбир уни алдаб юрганини билди ва шундан кейин жуфтлик ажрашди.

Бундай вазиятда кўплаб аёллар тўхтаб қолиб, уйга қайтиб, омманинг кўзидан яширинишарди. Аммо Дипика оғриқни ичига ютди ва жилмайиб қўйди. У 5 йиллик курашдан сўнг  актриса сифатида порлашига имкон берадиган ролга эга бўлди.

Ўша йили Дипика уни сўзсиз қўллаб-қувватлаган ва севадиган инсонни топди — бу Ранвир Сингх. Дипика турмуш қуриш ўрнига янги қийинчиликларни излашда ва ғалаба қозонишда давом этди. У Ҳиндистоннинг икки буюк актёри Ирфан Хон ва Амитабҳ Баччан иштирок этган “Пику” фильмида роль ўйнади.

Кейинроқ актрисанинг депрессия билан курашаётгани оммага ошкор бўлди ва у мактаб ўқувчилари, шифокорлар, ижтимоий тармоқларда депрессия ҳақида маълумот берувчи нодавлат ташкилотга асос солди.

Дипика Голливудда “Уч икс: Дунё ҳукмронлиги” жанговар фильмида ўйнади ва Ғарбдаги карьераси юксалмагандан кейин Ҳиндистонга қайтди.

У “Падмавати” номли ҳинд достонидаги қийин ва юқори даражадаги ролни ўз зиммасига олди ва яна бир бор энг юқори поғонага чиқди. Ушбу драманинг улкан муваффақиятидан сўнг, Дипика ва Ранвир 6 йиллик муносабатларини мустаҳкамлаб, 2018 йилнинг ноябрида расман никоҳдан ўтди.

Дипика Падуконе 2020 йилда “Муҳр” фильмининг чиқиши билан продюсерга айланди, у фильмда кислота ҳужуми қурбони  бўлган қиз ролини ижро этди. Актриса 2022 йилда мухлисларига “Чуқурлик" драмасини тақдим этди ва тез орада “Pathan” кинокартинасида партнёри Шоҳруҳ Хон билан экранга чиқади. Бундан ташқари актриса Прабҳас ва Ритик Рошан билан йирик лойиҳаларда ҳам суратга тушади.