Қирғизистон президентининг қиммат кийими яна муҳокамага сабаб бўлди
Қирғизистон сегментидаги ижтимоий тармоқ фойдаланувчилари мамлакат президенти Садир Жапаровнинг гардеробини диққат билан кузатишда давом этмоқда. Бу сафар Жапаровнинг эгнидаги кардиган муҳокамаларга сабаб бўлди. Бу ҳақда 24.кг хабар берди.
Маълум қилинишича, Қирғизистон раҳбари Бишкек яқинида жойлашган 73809-сонли ҳарбий қисмига режадан ташқари ташрифида мазкур кийимда кўриниш берган. Жапаров ташриф давомида ҳарбий хизматнинг аҳволи ва шароити билан танишган, командирлар ва аскарлар билан суҳбатлашган, ҳарбий қисмнинг моддий-техник базасини яхшилаш зарурати ҳақида гапирган. Ижтимоий тармоқ фойдаланувчилари эътиборини президент эгнидаги Италиянинг Паул&Шарк брендининг комбинацияланган кардиганига қаратган.
Бренднинг расмий сайтида бундай кардиганнинг чегирма нархи 781,20 еврога (838,05 доллар) баҳоланган. Илгари у 1116 еврода (1197 доллар) сотилган. Қирғизистон президенти урфдаги кийимларни кузатиб бориши ва гардеробини мунтазам янгилаб туриши қайд этилган.
2022 йилнинг февраль ойида Жапаров Италия брендининг қимматбаҳо курткасида пойтахт бозорларини кезганди. 2022 йил декабрь ойида Қирғизистон президенти ва миллий хавфсизлик давлат хизмати раҳбарининг қиммат курткаси муҳокамага сабаб бўлган.
Бундан аввал ҳам Садир Жапаров ва унинг рафиқаси Ойгул Жапарованинг қимматбаҳо чанғи либоси муҳокамаларга сабаб бўлганди. Уларнинг устидаги либослари қимматбаҳо маркали курткаларга жуда ўхшашлиги айтилган.
Тахминларга кўра, президент эгнидаги куртка Lynn брендига тегишли бўлиб, 105 минг сом (тахминан 13 миллион сўм) туради. Биринчи хонимнинг устидаги куртка эса Тони Саилер брендига тегишли бўлиб, нархи тахминан 140 минг сомни (тахминан 20 миллион сўм) ташкил қилган.
