Германиянинг Риэдлинген шаҳарчаси яқинида 27 июль куни йўловчи поезд рельсдан чиқиб кетди. Оқибатда 3 киши ҳалок бўлиб, яна бир неча йўловчи оғир жароҳат олди. Бу ҳақда маҳаллий полицияга таяниб BBC хабар берди.
Аён бўлишича, ҳалокат 27 июль куни кечки пайт Стуттгарт яқинидаги Риэдлинген шаҳарчаси ҳудудида содир бўлган. Воқеа сабабига ҳали аниқлик киритилмаган, аммо ҳалокат олдидан ҳудудда кучли бўрон кузатилгани айтилмоқда.
DPA нашрининг билдиришича, поездда 100 га яқин йўловчи бўлган, 2 та вагон ўрмонзор ҳудудида маҳаллий вақт билан соат 18:10 атрофида ағдарилиб кетган.
“Ҳозирча, суриштирув натижаларига кўра, 3 киши ҳалок бўлган, яна бир нечта йўловчи оғир тан жароҳати олган”, дея баёнот берди Улм полицияси.
Ижтимоий тармоқларда тарқалган суратларда поезд вагонлари ағдарилиб кетгани, воқеа жойида тез ёрдам гуруҳлари ишлаётгани акс этган. Шунингдек, қулаб тушган дарахтлар ҳам кўзга ташланади.
Германия миллий темирйўл компанияси Deutsche Bahn’нинг хабар беришича, поезд Сигмаринген ва Улм шаҳарлари орасида 90 километр масофани босиб ўтаётган бўлган. Компания ҳалокатдан жабрланганларга ҳамдардлик билдирган.
Германия канцлери Фреидрих Мерс ҳодиса юзасидан Х ижтимоий тармоғида баёнот берган. Хусусан, у ҳалок бўлганлар учун ҳамдардлик билдириб, уларнинг оилаларига чуқур таъзия изҳор этган. Канцлер ички ишлар ва транспорт вазирлари билан бевосита алоқада экани ва қутқарувчиларга зарур ёрдам кўрсатилишини маълум қилган.
Изоҳ (0)