Европа Кенгаши Бош котиби Россия учун махсус трибунал яратиш вариантларини айтди

Европа Кенгаши Бош котиби Мария Пейчинович-Бурич Россия раҳбариятини жавобгарликка тортиш учун махсус трибунал яратишнинг турли вариантларини айтди. Бу ҳақда Европейская правда хабар берди.

Пейчинович-Бурич махсус трибунал ташкил этишнинг турли вариантларини таклиф қилди ва мустаҳкам қонунчилик базаси зарурлигини айтди. У Ньюрнберг халқаро ҳарбий трибунали, Узоқ Шарқ бўйича халқаро ҳарбий трибунал ёки Халқаро жиноий суд преседентларига амал қилган ҳолда Украина ва бошқа манфаатдор давлатлар ўртасида кўп томонлама битим тузиш йўли билан махсус трибунал яратиш мумкинлигини таъкидлади.

Яна бир вариант Украина ва халқаро ташкилот, хусусан, Бирлашган Миллатлар Ташкилоти ўртасидаги келишув асосида махсус трибунал ташкил этилиши бўлиши мумкин. БМТ Хавфсизлик Кенгаши резолюцияси асосида тўғридан-тўғри махсус трибунал яратиш қонуний жиҳатдан мумкин, аммо Россия томонидан вето ҳуқуқидан фойдаланиш эҳтимоли туфайли бу истиқболли кўринмайди. 

Яна бир вариант Украина қонунчилигига асосланган ва БМТ бош ассамблеяси томонидан маъқулланган ёки қўллаб-қувватланадиган гибрид трибунал бўлиши мумкин. Бундай трибунал кучли халқаро таркибий қисмларга эга бўлган Украина ҳуқуқ тизими билан боғлиқ бўлиши мумкин.

“Maxсус трибунал билан боғлиқ ҳар қандай фаолият тегишли мавжуд механизмлар, хусусан, Халқаро жиноий суд билан мувофиқлаштирилиши керак”, — деди Пейчинович-Бурич.

Шунингдек, у Европа Кенгаши Россиянинг Украинага ҳужуми оқибатида етказилган зарар, йўқотиш ва жароҳатлар тўғрисидаги далиллар ҳамда даъволарни тўплаш ва ҳужжатлаштириш учун реестрни яратишда етакчи рол ўйнашини айтди.

Хусусан Европа Кенгаши Инсон ҳуқуқлари бўйича Европа суди амалиёти ва унинг қарорларини назорат қилиш жараёнини ҳисобга олган ҳолда, бундай аризалар реестрини ишлаб чиқиш учун яхши имкониятга эга. Ташкилот аллақачон ҳуқуқий ва сиёсий маслаҳатлар беради, зўравонлик қурбонлари, айниқса аёллар билан ишлайдиган тергов экспертлари ва мутахассисларни тайёрлайди. Бу ва бошқа тадбирлар Европа Кенгашининг Украина бўйича 2023-2026 йилларга мўлжалланган ҳаракат режасига киритилган.

Мавзуга доир: Германия ташқи ишлар вазири Путинни қандай судлаш бўйича схема таклиф қилди