“Россия ютқазади, Украина ғалабаси дунёни ўзгартиради”: Зеленский Буюк Британия парламентида нутқ сўзлади (видео)

Украина президенти Владимир Зеленский 7 февраль куни Британия парламентида нутқ сўзлаб, Россия Украина билан урушда мағлубиятга учрашини айтди. Унинг нутқи YouTube’даги “Суспилне” телеканали орқали намойиш этилди.

“Эски ёвузлик устидан ғалаба қозонишимиз биланоқ, янгиси бошини кўтаришга ҳаракат қилмоқда. Эркинлик ғалаба қозониши, Россия эса мағлуб бўлишини биламиз”, — деди Зеленский.

Украина президенти Россия устидан қозонилган ғалаба дунёни ўзгартиришини қайд этди.

“Британия биз билан ҳаётимиздаги энг катта ғалаба сари юрмоқда. Бу аввало уруш ғояси устидан ғалаба қозонишни англатади. Шундан кейин ҳар қандай агрессор халқаро тартибни бузиш қандай оқибатга олиб келишини кўради”, — деди сиёсатчи.

Зеленский Британия Украинага Challenger 2 танкларини ҳарбий ёрдам сифатида бериши ҳақида гапириб, Украинага узоқ масофали ракеталар юборишга чақирди.

“Бу қуролларнинг барчаси душманни, унинг логистика марказларини йўқ қилиш имконини беради”, — деди у.

Сиёсатчи яна бир бор Ғарб иттифоқчиларини Украина Қуролли кучларини жанговар самолётлар билан таъминлашга чақирди. У Британия парламенти спикери Линдси Хойлга “бизда эркинлик бор, уни ҳимоя қилиш учун бизга қанот беринг” ёзуви туширилган украиналик учувчининг дубулғасини берди.

Зеленский Украина ва Британия “ёвузликка” қарши курашда умумий тажрибага эга эканини эслатди.

“Икки йил олдин Британия парламентини тарк этиб, мазали инглиз чойи учун сизга миннатдорлик билдирдим. Бугун қудратли Британия самолёти учун барчангизга олдиндан миннатдорлик билдириб, парламентни тарк этаман”, — деди Украина президенти нутқи якунида.

Владимир Зеленский Лондонга ташрифидан сўнг Парижга бориши, у ерда Франция президенти Эммануэл Макрон ва Германия канцлери Олаф Шольц билан учрашиши кутилмоқда.

Мавзуга доир: Зеленский Брюсселдаги Европа Иттифоқи етакчилари саммитида шахсан қатнашишга таклиф қилинди