Россиялик миллатчи, Украинага босқин рамзи бўлган “Z” ихтирочиларидан бири Игор Мангушев вафот этди. У бошидан ўқ еганди
Россиялик миллатчи, Украинага бостириб киришда қатнашган Игор Мангушев Луганск вилоятининг аннексия қилинган қисмидаги Стаханов шаҳри касалхонасида вафот этди. Бу ҳақда унинг дўсти, “ҳарбий қўмондон” Аким Апачев “РИА Новости”га маълум қилди.
Аввалроқ Апачев 4 февралга ўтар кечаси Игор Мангушев тўппонча билан бошидан яралангани, ўқ яқин масофадан узилгани ҳақида айтганди. 5 февраль куни Мангушевнинг рафиқаси Татьяна Азаревич Россия Мудофаа вазирлигига мурожаатнома ёзиб, унда бу воқеа “қатлга уриниш” бўлгани ҳақида гапирди.
Аким Апачевнинг даъво қилишича, 7 февраль куни Мангушевнинг яраланиши бўйича иш материаллари Россия Тергов қўмитасига топширилган, терговчилар эса гумонланувчининг шахсини аниқлашган. Россия Тергов қўмитаси бу ҳақда расман изоҳ бермади.
Игор Мангушев, “РИА Новости” хабарига кўра, ўзини ўзи республика деб эълон қилган Луганск халқ республикасининг “Сурикат” халқ милицияси бўлинмасига қўмондонлик қиларди. Мангушевнинг ўзи 2022 йил март ойида Meduza нашрига берган интервьюсида ўзини сиёсий стратег ва “ЛХРнинг истеъфодаги капитани” деб атаганди.
Очиқ маълумотларга кўра, 2010 йиллар бошида Мангушев “Светлая Рус” миллатчилик ташкилотини бошқарган ва миграция хизмати томонидан ўтказилган муҳожирларга қарши рейдларга рус миллатчиларини жалб қилган. Мангушев, шунингдек, ўзини “ЕНОТ” хусусий ҳарбий компаниясининг асосчиси деб атайди. Бу гуруҳ аъзолари 2014 йилда Украинада жанг қилган, унинг таркибида миллатчилар билан бир қаторда Федерал хавфсизлик хизмати зобитлари ҳам бор эди.
Бундан ташқари Мангушев Meduza нашрига у ва унинг ҳамкорлари Россиянинг Украинага босқини рамзи сифатида “Z” белгисини ихтиро қилганини айтганди.
2022 йил август ойида Россия ОАВлари Игор Мангушев Донецкда ЛХР ҳарбийлар олдида нутқ сўзлаётиб қўлида одам бош суягини ушлаб тургани ҳақида хабар берганди. Интернетда жойлаштирилган видеода Мангушев бу Мариуполдаги украиналик “азовчи”нинг бош суяги эканини айтган. Украина ушбу видео туфайли БМТга мурожаат қилган.
